Ի տարբերություն Կենտրոնական բանկի, կառավարության գնահատականները ԵՏՄ անդամագրումից ակնկալվող գնաճային սպասումների վերաբերյալ մի փոքր ավելի հոռետեսական են։ Մինչ գների կայունությունը երաշխավորող կառույցը առավելագույն գնաճի հավանականությունը գնահատում է 0,4 տոկոս, կառավարությունը կանխատեսում է, որ այն կարող է հասնել մինչեւ 0,6 տոկոսի։
Խոսքը ներմուծվող այն ապրանքների թանկացումների մասին է, որոնց համար Եվրասիական տնտեսական միության անդամագրման գործընթացում արտոնյալ ժամկետներ նախատեսված չեն։ Թեեւ ԵՏՄ անդամ երկրների հետ բանակցությունների միջոցով կառավարությանը հաջողվեց մաքսատուրքերի կիրառման արտոնյալ ժամկետներ ստանալ շուրջ 750 անուն ապրանքների համար, այնուհանդերձ քիչ չեն նաեւ այնպիսիք, որոնք դուրս մնացին այդ ցանկից։
Դրանցում կան նաեւ լայն սպառման առաջին անհրաժեշտության այնպիսի ապրանքատեսակներ, ինչպիսիք են ոսպը, ոլոռը, հավի բուդը, տավարի մսի պահածոն, խտացրած կաթը, եգիպտացորենի բուսական յուղը, ծխախոտը, թեյը, օծանելիքը եւ այլն։ Նոր տնտեսական տարածքում հունվարի 1-ից այդ ապրանքների մաքսատուրքերը կփոխվեն՝ հանգեցնելով լրացուցիչ գնաճային ճնշումների։ Արդեն իսկ այժմ դրանց մի մասի գները սկսել են բարձրանալ։
Նոր տնտեսական տարածքից ակնկալվող դրական սպասումներով հանդերձ, քիչ չեն նաեւ նույն միջավայրից թելադրված ռիսկերը։ Եվ պատահական չեն այն մտահոգությունները, որ կան անդամագրման հետ կապված։
Կարդացեք նաև
ԵՏՄ մեկնարկին ընդառաջ բավական լարված իրավիճակ է Ռուսաստանի տնտեսության մեջ եւ ֆինանսական համակարգում։ Մինչդեռ միության անդամ երկրների, այդ թվում՝ Հայաստանի հիմնական սպասելիքները կապված են ՌԴ տնտեսության հետ։ Եթե այստեղ ձեւավորված ոչ այնքան բարենպաստ իրավիճակը շարունակի խորանալ, ապա դա կարող է խնդիրներ ստեղծել նաեւ ԵՏՄ անդամ մյուս երկրների համար։
Վերջին շրջանի զարգացումները վկայում են, որ ռուսական տնտեսության վատթարացումն այս կամ այն ձեւով փոխանցվում է նաեւ անդամ երկրների տնտեսություններին։ Դա առավել եւս նկատելի է Հայաստանի դեպքում՝ հաշվի առնելով երկու երկրների տնտեսական չափազանց ընդգրկուն կապերը։ Երբեմն այդ ազդեցությունը կոնկրետ է արտահայտվում։
Այնպես, ինչպես մասնավոր տրանսֆերտների դեպքում, որոնց քիչ թե շատ էական կրճատումն արդեն ունենում է լուրջ սոցիալ-տնտեսական հետեւանք։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
