Ադրբեջանի նախագահ Իլհամ Ալիևը դեկտեմբերի 1-ին «Ռոսիա 24» հեռուստակայանին տված հարցազրույցում բողոքել է, որ նախագահների փարիզյան հանդիպումից շատ չանցած Հայաստանը զորավարժություն է անցկացրել ղարաբաղա-ադրբեջանական սահմանի մոտ:
«Ե՛վ հայկական կողմը, և՛ ադրբեջանականը դրական են գնահատել Փարիզի հանդիպումը: Սակայն ուղիղ երկու շաբաթ անց Հայաստանը սկսեց այսպես կոչված զորավարժություններ անցկացնել «մեր տարածքների գրավված հատվածներում»: Հարց է առաջանում, ո՞րն էր անհրաժեշտությունը Փարիզի դրական հանդիպումից անմիջապես հետո «սադրիչ գործողություններ» անելը», – ասել է Ալիևը, այդպիսով՝ Հայաստանին մեղադրելով իրենց կողմից ԼՂՀ ուղղաթիռի խոցման դեպքի մեջ, որի հետևանքով երեք հոգի էր զոհվել, իսկ ուղղաթիռը կործանողին Ադրբեջանն անմիջապես պարգևատրել էր:
Ալիևը ռուս լրագրողի հետ զրույցում Ղարաբաղի խնդրի լուծված չլինելու պատճառը կրկին ամբողջությամբ վերագրել է Հայաստանին, թեև շեշտել է, որ իրենց համար մեկ լուծում գոյություն ունի՝ ազատագրված տարածքներից հայկական ուժերի դուրս բերումը.
«Մենք տպավորություն ունենք, և այն բավական արմատացած է հասարակության մեջ, որ Հայաստանը խաղաղություն չի ուզում, չի ուզում, որ լուծվի այս հարցը, ուզում է թողնել ամեն ինչ այնպես, ինչպես կա, այլ բառերով՝ ուզում է պահպանել ստատուս-քվոն: Թեպետ ԵԱՀԿ Մինսկի խմբի համանախագահները մեկ անգամ չէ, որ հայտարարել են, որ ստատուս քվոն անընդունելի է, այն պետք է փոխվի: Ստատուս-քվոյի փոփոխություն նշանակում է «ադրբեջանական տարածքների օկուպացիայի վերացում», ինչը հակամարտության կարգավորման գլխավոր պայմանն է», – իր տեսակետն է հայտնել ԱՀ ղեկավարը՝ կարծելով, որ հայ-ադրբեջանական խնդիրը հետխորհրդային երկրների մյուս բոլոր հակամարտություններից առանձնանում է նրանով, որ այս դեպքում առկա է ՄԱԿ-ի Անվտանգության խորհրդի 4 բանաձևեր, որոնք պահանջում են «դուրս բերել զորքերը գրավյալ տարածքներից»: Ալիևի ցանկությունն է, որ հենց այդ բանաձևերը լինեն ԼՂ խնդրի կարգավորման գործընթացի հիմքում, քանի որ ըստ նրա, «այլ տարբերակ հնարավոր չէ»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
