ՀՀ ԱԺ պատգամավոր, Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանի ելույթն ԱԺ հայտարարությունների ժամին
Երեկ Ադրբեջանի միապետը նշել է, թե Հայաստանը չի ցանկանում առաջընթաց Արցախյան հիմնահարցում՝ փորձելով պահպանել ստատուս քվոն։ Ալիևը հիշեցրել է ՄԱԿ-ի չորս բանաձևերը, որոնք իբրև թե անտեսվում են Հայաստանի կողմից։
Ադրբեջանի նախագահի կողմից նշված չորս բանաձևերի վերաբերյալ շահարկումներին լավագույնս անդրադարձել է Հայաստանի նախագահ Սերժ Սարգսյանն այս տարի սեպտեմբերին կայացած ՄԱԿ-ի գլխավոր ասամբլեայի 69-րդ նստաշրջանում։ Թարմացնենք Ալիևի հիշողությունը՝ մեջբերելով Հայաստանի նախագահի ելույթից հատվածներ։
ՄԱԿ-ի բոլոր չորս բանաձևերում որպես առաջնային և անվերապահ պահանջ նշվում է ռազմական և թշնամական գործողությունների դադարեցումը, ինչն այս տարիների ընթացքում չի իրականացվել Ադրբեջանի կողմից: Հենց Ադրբեջանի կողմից այս բանաձևերի հիմնարար պահանջները չկատարելու հետևանքով էր, որ անհնար դարձավ դրանց ամբողջական իրականացումը:
Կարդացեք նաև
Բանաձևերում կոչ է արվում դադարեցնել խաղաղ բնակչության ռմբակոծություններն ու օդային հարվածները, զերծ մնալ միջազգային մարդասիրական իրավունքի սկզբունքների ոտնահարումից, ինչին ի պատասխան՝ Ադրբեջանը շարունակում է ռմբակոծել խաղաղ բնակչությանը՝ տարբերություն չդնելով երեխաների, կանանց, մեծահասակների միջև՝ կոպտորեն խախտելով միջազգային հումանիտար իրավունքի բոլոր իրավական և բարոյական նորմերը:
Նշված բանաձևերում կոչ է արվում Ադրբեջանի իշխանություններին ուղիղ շփումներ հաստատել Լեռնային Ղարաբաղի հետ: Ադրբեջանը ոչ միայն ուղիղ շփումներ չի հաստատում Արցախի հետ, որը 1994թ. հրադադարի և մի շարք այլ միջազգային համաձայնագրերի իրավահավասար կողմ է, այլև թշնամանք է քարոզում։
Ոչ մի բանաձևում Հայաստանը չի նշվել որպես հակամարտող կողմ: Մեր երկրին ուղղված կոչերում միայն խոսվում էր «շարունակել ազդեցություն գործադրել» ԼՂ հայության վրա հակամարտությունը դադարեցնելու համար, ինչը Հայաստանը լիարժեք իրականացրել է, և նաև դրա շնորհիվ 1994թ. կնքվել է զինադադար: Բոլոր բանաձևերում ԼՂ-ն հստակորեն ճանաչվել է հակամարտող կողմ:
Ադրբեջանի շարունակում է մարդասիրական նորմերի խախտումը. գերեվարված հայերի, խաղաղ բնակիչների նկատմամբ դաժան և անմարդկային վերաբերմունքը, որը շատ հաճախ նրանց մահվան պատճառ է հանդիսանում: Զորավարժությունների ժամանակ «հերոսություն» են անում ուղղաթիռ խոցելով, չեն թողնում մոտենալ մեր զոհերի դիերին և այլն։
Սրանք ընդամենը ոչ ժողովրդավար երկրի նախագահի նյարդային դրսևորումներն են։ Քանի որ կատարյալ ֆիասկո է ապրում Ալիևի ռազմական արկածախնդրությունը, դե, մարդն էլ նյարդայնանում է։ Իսկ նյարդայնացողներին, ինչպես Վլադիմիր Գասպարյանն է ասում, մի մխիթարանք կա՝ սառը ցնցուղ ընդունեք։
