«Պատկերացնենք, որ այս ավանտյուրան կյանքի է կոչվում, այս պուտինիզմի շարունակության ներքո Ադրբեջանն էլ է ԵՏՄ-ին անդամակցում: Այս դեպքում ձեր կառավարությունն ի՞նչ դիրքորոշում կհայտնի, թե՞ մեր ապրանքները տանելու ենք այնտեղ վաճառելու»,-այսօր ՀՀ ԱԺ-ում «Եվրասիական տնտեսական միության մասին» 2014-ի մայիսի 29-ի պայմանագրին միանալու մասին» պայմանագրի վավերացման հարցի վերաբերյալ քննարկման ժամանակ այսպիսի հարց բարձրացրեց ՀՀ ԱԺ «Ժառանգություն» խմբակցության պատգամավոր Զարուհի Փոստանջյանը:
Նա նաև հարցրեց, թե մեր կառավարությունը արե՞լ է հաշվարկներ այն մասին, որ ՌԴ անկայուն շուկայում մեր արտահանողներն ի՞նչ ռիսկերի են դիմակայելու:
Զարուհի Փոստանջյանին հետաքրքրեց նաև, թե մաքսային գրագրությունը ի՞նչ լեզվով է կատարվելու:
Սուրեն Կարայանը պատասխանեց. «Դեռ Ադրբեջանի կողմից հայտ չկա ներկայացված անդամակցության: Երբ լինի, այն ժամանակ էլ կքննարկվի»:
Կարդացեք նաև
Ռիսկերի հետ կապված հարցին ի պատասխան փոխնախարարն ասաց. «Դրանք մեր տնտեսվարող սուբյեկտների բիզնես ռիսկերն են, որոնք ցանկացած շուկայում կարող են առկա լինել` փոխարժեքի տատանումներից ելնելով: ՀՀ կառավարության խնդիրը չէ ամբողջական լուծում տալ այդ հարցին, մենք կարող ենք մեղմացնել դա»:
Լեզվի մասին հարցին ի պատասխան Սուրեն Կարայանն ասաց. «ԵՏՄ պայմանագրում նշված է, որ պաշտոնական լեզուն ռուսերենն է, սակայն բոլոր փաստաթղթերը լինելու են անդամ երկրների լեզուներով, մաքսազերծումները` ըստ ներմուծողի ցանկության, լինելու են և ռուսերեն, և տվյալ երկրի լեզվով»: Զարուհի Փոստանջյանը արձագանքեց, թե համաձայնագրում նման բան նշված չէ:
Հարակից զեկուցող ՀՀ ԱԺ Տնտեսական հարցերի մշտական հանձնաժողովի նախագահ Վարդան Այվազյանին ևս Զարուհի Փոստանջյանը փոխանցեց Ադրբեջանի` հավանական անդամակցության հարցը: Վարդան Այվազյանն ասաց, որ կփորձի հարցերին բավարար պատասխաններ տալ` թեև «ձեր բավարարման չափանիշներն ինձ համար անհասանելի են» ու «Հեսա Ադրբեջանի հարցին էլ պատասխան կտամ, համբերի» ասելով, այդպես էլ այդ հարցի պատասխանը չհնչեցրեց:
Նա նշեց, որ ներկայիս ինտեգրացիոն գործընթացները ուղիղ համեմատականով են ազդելու ՀՀ-ի վրա, քանի որ «ՀՀ-ն կախված է արտաքին տրանսֆերտներից, որոնց մեծ մասը գալիս է «ձեր չսիրած» ՌԴ-ից»:
Վարդան Այվազյանի պարզաբանումները, թե թանկացումներ չեն լինելու, չբավարարեցին Զարուհի Փոստանջյանին. ասաց, թե դրանք համոզիչ չեն: Վարդան Այվազյանն էլ արձագանքեց. «Խնդրում եմ իմ բառերը չձևափոխեք, ես ձեզ ասում եմ չի թանկանալու: Ինձ հետաքրքրում է ՀՀ տնտեսական վիճակը: Ստեղծվում է լրացուցիչ հնարավորություն`ասեմ, չէ՞»:
Տաթև ՀԱՐՈՒԹՅՈՒՆՅԱՆ
