«Իմպիչմենտի նախագիծը Նիկոլ Փաշինյանի կողմից մի փորձ էր՝ ցույց տալու, թե իրականում ինչպիսին է խորհրդարանական ոչ իշխանական ուժերի դիրքորոշումը»,- այսօր՝ դեկտեմբերի 2-ին, «Հայելի» մամլո ակումբում լրագրողների հետ հանդիպման ընթացքում հայտարարեց ՀՀՇ կուսակցության նախագահ Արարատ Զուրաբյանը:
Նա նշեց, որ այդ փորձը անհրաժեշտ էր, բայց այն ոչինչ էլ չի փոխում. «Այդ գործընթացը լակմուսի թուղթ էր: Նրանք, ովքեր ուզում են, որ Հայաստանում իշխանությունը փոխվի, կարող են նախաձեռնել այդ փաստաթուղթը եւ ինչ-որ գործընթաց սկսել: Կարելի է հազար ու մի բացատրություն բերել, բայց մի բան ակնհայտ է՝ մի փոքրիկ հարցի շուրջ իրար պաշտպանելու, համախմբելու գործընթաց է տեղի ունենում, մարդիկ շատ հեշտությամբ կարողանում են ոչ կարեւոր հարցի շուրջ միասնական հանդես գալ: Իշխանության նորմալ ձեւավորման համար յուրաքանչյուր քաղաքական գործիչ ինքը պետք է պայքարի»:
Պարոն Զուրաբյանը ողջունելի է համարում Ազգային ժողովի պատգամավոր Նիկոլ Փաշինյանի նախաձեռնությունը եւ խոստովանեց, որ եթե խորհրդարանական լիներ, ապա կստորագրեր այդ նախաձեռնության տակ:
Ամի ՉԻՉԱԿՅԱՆ
