ՀՀ ԱԺ-ում «Եվրասիական տնտեսական միության մասին» 2014-ի մայիսի 29-ի պայմանագրին միանալու մասին» պայմանագրի վավերացման հարցի վերաբերյալ թեժ քննարկումներ են ընթանում:
Զեկուցող ՀՀ ֆինանսների փոխնախարար Սուրեն Կարայանը փորձում է ամեն գնով հավաստիացնել, որ ԵՏՄ-ին անդամակցությունը նոր հնարավորություններ է բացում ՀՀ-ի առաջ, մինչդեռ պատգամավորներից շատերը մտահոգություններ են հայտնում այս առումով:
«Ժառանգություն» խմբակցության պատգամավոր, ՀՀ նախկին արտգործնախարար Ալեքսանդր Արզումանյանը Սուրեն Կարայանի հավաստիացնումները «մանտրա» համարեց ու շեշտեց, թե «էդ մանտրաները հա կրկնելով՝ մեր կասկածները չեն փարատվում և գործողությունները ցույց են տալիս, որ խնդիրներ կան»:
Մասնավորապես, ի հակադրություն Սուրեն Կարայանի այն հավաստիացումների, թե օտարերկրյա ներդրումները կավելանան ԵՏՄ անդամակցությունից հետո, պարոն Արզումանյանը վկայակոչեց «Բլումբերգ» գործակալության հարցումները, համաձայն որոնց` աշխարհի խոշոր գործարարների 52 տոկոսը ռուսական շուկան համարում է համաշխարհային ֆինանսական շուկաների թիվ մեկ սպառնալիքը: Ու հարց բարձրացրեց` այդ դեպքում ինչպե՞ս պետք է ներդրումներ կատարեն հենց այդ շուկայում: Պարոն Արզումանյանը շեշտեց. «Գնում ենք ռիսկային գոտի. ոչ ՌԴ-ում կա ազատ շուկա, ոչ էլ մյուս երկու պետություններում: ՌԴ-ում քաղաքական որոշումներով են որոշում ում սնանկացնեն, ում` ոչ, գումարած պատժամիջոցները, Բելառուսում ընդհանրապես Խորհրդային Միություն է` Բատկայի ղեկավարությամբ: Նորից կրկնեմ, գնում ենք ռիսկային գոտի, պատժամիջոցների իրավիճակում ենք, ուստի ոչ մի ներդրում էլ չենք սպասում»:
Կարդացեք նաև
ՀԱԿ խմբակցության պատգամավոր Գագիկ Ջհանգիրյանը բարձրացրեց ՀՀ-ի` լրացուցիչ ֆինանսական պարտավորությունների հարցը: Սուրեն Կարայանը պարզաբանեց. «ԵՏՄ-ն ստեղծում է իր բյուջեն, որը ֆինանսավորում է ԵՏՄ մարմինների գործունեությունը և այդ բյուջեում ՀՀ-ի ներդրումը` սկսած 2016-ի հունվարից կկազմի բյուջեի 1.13 տոկոսը»:
Պարոն Ջհանգիրյանին հետաքրքրեց նաև, թե հատկապես մաքսային օրենսդրության մասով ո՞ր մարմիններն են որոշումներ ընդունելու: Պարոն Կարայանը պատասխանեց. «ԵՏՄ-ն չունի խորհրդարան, մաքսային օրենսգիրքը և նմանատիպ այլ ակտերը մշակվելու են ԵՏՄ հանձնաժողովի կողմից, հավանության արժանանալու բոլոր մարմինների կողմից և պայմանագրի տեսքով մտնելու են բոլոր երկրների խորհրդարաններ: Այսինքն` մեր խորհրդարանն է վավերացնելու այն»:
Տաթև ՀԱՐՈՒԹՅՈՒՆՅԱՆ
