Ազգային ժողովի Դեմիրճյան փողոցի մուտքի դիմաց «Ո՛չ պարտադրող СССР մաքսային միությանը» պաստառով տասնյակ քաղաքացիներ ԱԺ մտնող պատգամավորներից այսօր պահանջում էին դեմ քվեարկել ԵՏՄ-ի՝ Հայաստանի անդամակցության մասին պայմանագրին:
ՀՀԿ պատգամավոր Վազգեն Կարախանյանին ԱԺ մուտքի մոտ բռնացրած ակտիվիստները նախազգուշացրին՝ «Եթե կողմ քվեարկեք, ուրեմն դավաճան եք»: Ի պատասխան պարոն Կարախանյանը բարկացավ եւ ասաց. «Նենց կապտակեի քեզ: Դու գիտե՞ս խորհրդային տարիներին ոնց եմ պայքարել»:
Մուտքի մոտ լրագրող Գայանե Առուստամյանը ՀՀԿ-ական մեկ այլ պատգամավորի՝ Սամվել Ֆարմանյանին ասաց, թե դավաճանության խարանը նրա ճակատին հավերժ կմնա, եթե ինքը կողմ քվեարկի: Սամվել Ֆարմանյանը չպատասխանեց այլ հարցերի, ասաց, որ հարգում է յուրաքանչյուրի կարծիքը, եւ հեռացավ:
ՀՀԿ խմբակցության պատգամավոր Սամվել Ալեքսանյանից էլ ակտիվիստները հետաքրքրվեցին՝ հայերի՞ն է կողմ, թե՞ ռուսներին: Պատգամավորն ասաց՝ կողմ է ե՛ւ ռուսներին, ե՛ւ հայերին:
Կարդացեք նաև
Արփինե ՍԻՄՈՆՅԱՆ
