Մեկնարկել է «Մասնագիտական կրթության որակի ապահովման ազգային կենտրոն» հիմնադրամի կողմից հայտարարված կրթության որակի ապահովման շաբաթը: Միջոցառումների մեկնարկը տրվեց այսօր ՀՊՏՀ-ում «Տեմպուս»-ի «Արարատ» ծրագրի ներկայացմամբ:
ՈԱԱԿ տնօրեն Ռուբեն Թոփչյանը, շնորհակալություն հայտնելով ներկաներին երկրում որակի ապահովման մշակույթի կայացմանը մասնակցության համար, նշեց, որ «Արարատ» ծրագիրը կարևոր գաղափար է հետապնդում: Թոփչյանն ասաց, որ բուհ-գործատու կապի ստեղծմամբ հնարավոր կլինի հստակեցնել, թե ինչ հմտություններով մասնագետի կարիք ունի աշխատաշուկան, և բուհն ու դասախոսն ինչ գիտելիքներ պետք է փոխանցեն ուսանողին, որպեսզի ունենանք պահանջված մասնագետ:
Ներկաներին ողջույնի խոսք հղեց ՀՊՏՀ պրոռեկտոր Պարույր Քալանթարյանը, Հայաստանում «Էրազմուս +» ծրագրի ազգային գրասենյակի համակարգող Լանա Կառլովան՝ կարևորելով Հայաստանում հերթական անգամ կրթության որակի ապահովման շաբաթ իրականացնելու ՈԱԱԿ նախաձեռնությունը:
ՈԱԱԿ ներկայացուցիչ Մկրտիչ Այվազյանը ներկայացրեց «Համալսարան-աշխատաշուկա ազգային ցանցը»-ի ստեղծման աշխատանքները: Նա նշեց, հիմնական խնդիրն այն է, որ թույլ է կապը բուհի և աշխատաշուկայի միջև. «Կան բուհեր, որոնք ուսումնասիրում են կարծիքներն իրենց շրջանավարտների վերաբերյալ, բայց այդ ուսումնասիրությունները չի կարելի համարել ամբողջական»: Այվազյանի խոսքով`խնդիր է նաև այն, որ չկան հանրության կողմից ճանաչված մասնագիտական ասոցիացիաներ, որոնք իրենց վրա աշխատաշուկայի պահանջները բուհերին ներկայացնելու պարտավորություն են վերցրել. Գործատուների միությունը միավորում է որոշ քանակի գործատուների, բայց միաժամանակ չի կարող ներկայացնել աշխատաշուկայի բոլոր ոլորտների պահանջները»:
Կարդացեք նաև
Նա տեղեկացրեց, որ «Արարատ»-ի շրջանակներում կստեղծվեն ոլորտային հանձնաժողովներ, որոնք կմշակեն որակավորումների ոլորտային շրջանակներ: Այդպիսով կապահովվի կրթական ծրագրերի համապատասխանությունը հավատարմագրման չափանիշներին, աշխատաշուկայի և հանրության պահանջներին, ինչպես նաև ոլորտի զարգացումներին:
Քննարկումների ժամանակ հարց հնչեց, թե ինչ լուծում կա իրավիճակին, երբ գործատուն նեղ մասնագիտական հմտություններ է պահանջում, իսկ բուհն ուսանողին տալիս է ընդհանուր գիտելիք: ՈԱԱԿ տնօրեն Ռուբեն Թոփչյանը նշեց, որ դեմ է գործատուի պահանջով մասնագիտացում ստեղծելուն, քանի որ նման պարագայում, եթե գործատուն շրջանավարտների համար 100 տոկոսով զբաղվածություն չապահովի, ապա հետագայում նրանք խնդիր կունենան աշխատանք գտնելիս: Նրա խոսքով`քանի որ շրջանավարտի կարիերայի ողջ ցիկլը կանխատեսել հնարավոր չէ, հարկավոր է առաջնորդվել ընդհանրական որակավորումներով:
«Համալսարանն այդքան նեղ չպետք է նայի շուկայի կողմը, բայց շուկան պետք է կողմնորոշի, թե ուսանողն ինչ ընդհանրական ու մասնագիտական կարողություններ պետք է ունենա»,- ասաց Թոփչյանը:
Գործատուների հանրապետական միության նախագահ Գագիկ Մակարյանը նշեց, թե մասնագիտական հմտությունների հարցում պետք է հաշվի առնել ոչ միայն խոշոր գործատուների , այլ անգամ փոքր ձեռնարկությունների և անհատ ձեռներեցների կարծիքները: Նա ասաց, որ արդեն իսկ գործատուները հարցաշարեր են լրացրել`ներկայացնելով իրենց կարծիքը: Ըստ այդմ` գործատուների հիմնական պահանջն է հստակ տարանջատել բակալավրիատի ու մագիստրատուրայի կրթական ծրագրերը:
Կրթության որակի ապահովման շաբաթվա շրջանակներում դեկտեմբերի 2-ին տեղի կունենա ALIGN, ARMENQA, TNE_QA ծրագրերի ձեռքբերումների և մարտահրավերների քննարկումը: Միջոցառման ժամանակ տեղացի և միջազգային գործընկերները կանդրադառնան Որակավորումների նոր շրջանակին և դրա համապատասխանությունը մասնագիտության կրթական ծրագրերի վերջնարդյունքներին, ինչպես նաև Ֆրանսիական համալսարանի գործընկերները կներկայացնեն ՀՀ-ում տրանսազգային կրթության ճանաչման խնդիրները: Դեկտեմբերի 3-ին կամփոփվեն «ՀՀ մասնագիտական կրթության որակի ապահովման համակարգերի մշակում և բարելավում» թեմայով եռափուլ վերապատրաստումների արդյունքները: Իսկ դեկտեմբերի 4-5-ին Հայաստանի ամերիկյան համալսարանում (ՀԱՀ) տեղի կունենա «Որակի մշակույթի ամրապնդումը ՀՀ մասնագիտական կրթական համակարգում. որակավորումների ճանաչման ապահովումը» շահակիցների երրորդ համաժողովը:
«Որակի մշակույթի ամրապնդումը ՀՀ մասնագիտական կրթական համակարգում. որակավորումների ճանաչման ապահովումը» համաժողովի իրականացմանն աջակցում են Հայաստանի ամերիկյան համալսարանը, Երևանի «Հայբուսակ» համալսարանը, Սբ. Թերեզայի անվան բժշկական համալսարանը, «Տեմպուս»-ի ARARAT, ALIGN, և TNE-QA ծրագրերը:
«Որակի ապահովման շաբաթի» ինֆորմացիոն հովանավորներն են Հանրային ռադիոն, «Առավոտ» օրաթերթը և «Անկախ» շաբաթաթերթը:
ՈԱԱԿ հասարակության հետ կապերի պատասխանատու
Հայկուհի Բարսեղյան
