«Կոմպասս» գիտահետազոտական, կրթական և խորհրդատվական կենտրոն» հ/կ-ի կողմից Հայաստանի տնտեսագիտական համալսարանի Գյումրու մասնաճյուղում կազմակերպված «Դրամի արժեզրկումը հնարավորությու՞ն, թե՞ մարտահրավեր» թեմայով հանրային քննարկման ժամանակ մասնակիցներից մեկը տնտեսագետներից հետաքրքրվեց, թե ի՞նչ կանխատեսումներ կան ռուսական ռուբլու փոխարժեքի վերաբերյալ: Տնտեսագիտական համալսարանի Գյումրու մասնաճյուղի պրոռեկտոր Արման Առաքելյանը թեև նշեց, որ կանխատեսումներ անելը անշնորհակալ գործ է, այդուհանդերձ փաստեց. «Ուկրաինական ճգնաժամը ոնց որ նորից թափ է առնում, դա քաղաքական ու հոգեբանական առումով նորից լուրջ ճնշում է ռուբլու վրա, մյուս կողմից Ռուսաստանի նկատմամբ նորից ուզում են նոր պատժամիջոցներ կիրառել, ավելի խիստ, սա ևս գործոն է : Ամեն դեպքում առաջին հայացքից որ նայում ես, ռուբլու վիճակը մոտ ապագայում ոնց որ թե լավ չի լինելու »:
Նույն համալսարանի դասախոս, տնտեսագետ Կարեն Պետրոսյանն էլ նկատեց. «Ռուբլու արժեզրկումն այն բացառիկ երևույթներից է, որ մեր կառավարությունը ուղղակի կապ չունի դրա հետ, և մեր տնտեսությունը ուղղակի կապ չունի, ավելի շատ կախված է դրանից, քան դրա վրա կարող է ազդել: Մենք չենք կարող էդ հանգամանքի վրա ազդել, որովհետև դա պայմանավորված է տարբեր գործոններով՝ համաշխարհային տնտեսությամբ, նավթի գներով, քաղաքական և այլն…Ավելի շատ ուզում եմ խոսել մեր վրա դրա ազդեցության մասին. շատ բացասական է երկու հիմնական առումով. 1-ին՝ ուղղակի կրճատում է մեր վճարունակ պահանջարկը, որովհետեւ դժբախտաբար մենք շատ-շատ կախված ենք ռուսական տնտեսությունից ու ռուսական ռուբլուց, և 2-րդ՝ էդ ամբողջ կարողության կրճատումը հանգեցնում է մեր տնտեսության ընդհանուր թուլացմանը: Այսինքն էս երկու գործոնով պայմանավորված՝ մենք բավականին լուրջ խնդիր ունենք: Ես չեմ ուզում կանխատեսումներ անել, որովհետև դրա համար շատ բարդ հետազոտություններ են պետք, բացի այդ կանխատեսումները, ինչպես ասվեց, անշնորհակալ գործ է: Կանխատեսումներ չեմ ուզում անել, որովհետև դրանք հենց գործոն են դառնում, բնակչության սպասումներն ընդհանրապես էական գործոններից մեկն են. սպեկուլյատիվ գործոն, որն արտարժույթի վրա ազդող գործոններից մեկն է և էս առումով որևէ մեկը գնահատական կարող է տալ և’ խուճապ առաջացնել, և’ հանգստություն: Դրա համար էլ տնտեսագետները երբեմն զերծ են մնում նմանատիպ գնահատականներից, բայց որ ռուբլու արժեզրկումը բերելու է մեր կյանքի, մեր կենսապայմանների վատացման, դա միանշանակ է:
Մասնակիցներից մեկը՝ տնտեսական աշխարհագրության մասնագետ Արտաշես Բոյաջյանը նկատեց. «Այսինքն կանխատեսում եք, որ պետք է վատ լինի, էլի»:
Նունե ԱՐԵՎՇԱՏՅԱՆ
Կարդացեք նաև
