«Սեպտեմբերի 3-ից հետո մենք տեսնում ենք բռնության հսկայական էսկալացիա»,- այսօր` դեկտեմբերի 1-ին, «Մեդիա կենտրոնում» լրագրողների հետ հանդիպման ընթացքում հայտարարեց «Նախախորհրդարանի» անդամ Վարդան Հակոբյանը:
Նրա խոսքերով` եթե մինչեւ 2013 թվականի սեպտեմբերի 3-ը ինչ-որ չափով ոստիկանության գործողությունները փորձում էին համապատասխանեցնել եվրոպական ստանդարտներին, ապա դրանից հետո ոստիկանների աշխատանքի մեթոդաբանությունը փոխվել է. «Ես այս ամենը կապում եմ Մաքսային միության մշակութային արատի հետ»:
Վարդան Հակոբյանը հայտարարեց, որ այդ գործողությունների արդյունքում հասարակության ակտիվ զանգվածը չի կոտրվում, այլ ավելի ակտիվանում եւ շատանում է. «Այդ բռնությունները բերում են քաղաքացիական հանրության ավելի բյուրեղացման: Իրենք եթե մտածում են, որ արդյունք կունենան, հակառակն է լինելու, իրենց չի հաջողվելու, մոտեցնել են իրենց վախճանին»:
Նա հավելեց` անկախ ամեն ինչից, «100-ամյակը առանց ռեժիմի» շարժման հայտարարած 2015 թվականի ապրիլի 24-ը ուժի մեջ է մնում. «Ոչինչ չի փոխվելու, 2015 թվականի ապրիլի 24-ը կայանալու է` անկախ նրանից, թե ո՞վ կիրականացնի դա, նույնիսկ եթե ղեկավար կազմից ոչ մեկը չլինի Հայաստանում կամ նույնիսկ, եթե ոչ ոք կենդանի չլինի, դա լինելու է: Նախատեսված են բոլոր ճանապարհները, բոլոր իրավիճակները: Մենք այլեւս ժամկետ չունենք, մենք չունենք բավարար թե’ մարդկային ռեսուրս, թե’ ազգային կարեւոր իրադարձություն, որը կարող է մեր մեջ արթնացնել պաշտպանական բնազդը, որպեսզի հասկանանք, որ մենք այսօր ապրում ենք կատարյալ ցեղասպանություն, 20 տարուց ավելի է 2 միլիոնից ավել մարդու վտարել են Հայաստանից, սա եւս ցեղասպանություն է: Եվ եթե մենք չենք ուզում որպես ազգ, որպես պետություն վերանալ, ապա դա այն վերջնաժամկետն է, որը գոյություն ունի մեր բոլորիս համար»:
Կարդացեք նաև
Ամի ՉԻՉԱԿՅԱՆ
