Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում դատավոր Արմեն Բեկթաշյանի նախագահությամբ Հայկ Կյուրեղյանի գործով երրորդ դատական նիստը եւս հետաձգվեց ամբաստանյալի ոտքի չկանգնելու պատճառով, ինչը գնահատվեց դատարանի նկատմամբ անհարգալից վերաբերմունք:
Դատավոր Արմեն Բեկթաշյանը բացատրեց քրեական դատավարության օրենսգրքով սահմանված դատական նիստի կարգը եւ դատարանի կողմից նախազգուշացրեց ամբաստանյալ Հայկ Կյուրեղյանին: Այնուհետեւ, դատավոր Արմեն Բեկթաշյանը ամբաստանյալին դիմեց` բացատրելու, թե ինչո՞ւ պաշտպան Արա Զաքարյանը դատական նիստին չի ներկայացել, ինչին Հայկ Կյուրեղյանը կրկին ոտքի չկանգնելով պատասխանեց. «Չեմ կարող բացատրել, բայց ես ցանկություն ունեմ հրաժարվել պաշտպանից եւ շարունակելու եմ չկանգնել»: Դատավոր Արմեն Բեկթաշյանը ընթերցեց նաեւ ՀՀ քրեական դատավարության օրենսգրքի համապատասխան հոդվածը, որով սահմանվում է պաշտպանից հրաժարվելու կարգը: Եվ քանի որ դատարանը չունի պատշաճ հրաժարում, դատավորը հայտարարեց, որ նիստը չի կարող շարունակվել: Նիստը հետաձգվեց մինչեւ դեկտեմբերի 17-ը, ժամը 12:00-ը:
Աշոտ ՀԱԿՈԲՅԱՆ
