Նախորդ տարիների համեմատությամբ այս տարի Հայաստանում ՄԻԱՎ վարակի ամենաշատ դեպքերն են գրանցվել. Այս տարվա 11 ամիսների ընթացքում 305 մարդու մոտ հայտնաբերվել է ՄԻԱՎ վարակ: Այս մասին այսօր` ՁԻԱՀ-ի դեմ պայքարի համաշխարհային օրվա առիթով առողջապահության նախարարությունում ասաց ՁԻԱՀ-ի կանխարգելման հանրապետական կենտրոնի տնօրեն Սամվել Գրիգորյանը: Ըստ նրա, դեպքերի ավելացումը պայմանավորված է հայտնաբերելիության բարձրացմամբ:
Պարոն Գրիգորյանի ներկայացմամբ, մեր երկրում ՄԻԱՎ-ը հիմնականում տարածվում է սեռական ճանապարհով: 1988թ-ից ի վեր՝ 2014թ-ի դեկտեմբերի 1-ի դրությամբ ՀՀ քաղաքացիների շրջանում գրանցվել է ՄԻԱՎ վարակի 1924 դեպք:
ՄԻԱՎ վարակով հիվանդների մեծ մասը արական սեռի ներկայացուցիչներ են՝ 1329 մարդ (69%), իգական սեռի ներկայացուցիչների մոտ արձանագրվել է վարակի 595 դեպք (31%): ՄԻԱՎ վարակի 38 դեպք (2%) է արձանագրվել երեխաների մոտ։
Aravot.am-ի այն դիտարկմանը` եթե ամենաշատը մարդիկ վարակվում են սեռական ճանապարհով, գուցե քարոզչությունը բավարար չափով չի տարվում, պարոն Գրիգորյանն ասաց, որ շատ հաճախ մարդիկ վտանգների մասին տեղեկացված լինելով էլ ռիսկային վարքագիծ են վարում:
Կարդացեք նաև
Կենտրոնի տնօրենի մեկնաբանությունները` տեսանյութում
Նշենք, որ 2013թ-ի դրությամբ, աշխարհում 35 միլիոն մարդ ապրում է ՄԻԱՎ-ով:
Նրանց գերակշիռ մասը՝ 24,7 միլիոն՝ Սահարայից հարավ ընկած Աֆրիկայում, իսկ Արևելյան Եվրոպայի եւ Կենտրոնական Ասիայի տարածաշրջանում, որի մեջ մտնում են նաեւ Հայաստանը ու նախկին Խորհրդային Միության հանրապետությունները, ՄԻԱՎ-ով ապրող մարդկանց թիվը հասել է 1,1 միլիոն–ի։
Մեր երկրում վարակվածների 53%-ն ախտորոշման պահին եղել է 25-39 տարիքային խմբում։ Պարոն Գրիգորյանն ասաց, որ նվազել է թմրամիջոցների ներարկային օգտագործման միջոցով վարակումը, որն այսօր կազմում է ՄԻԱՎ վարակակիրների 28%-ը: Վարակի փոխանցման հիմնական ուղիներից է մնում նաեւ հետերոսեքսուալ ճանապարհը: ՄԻԱՎ վարակով հիվանդներից 983-ի մոտ ախտորոշվել է ՁԻԱՀ, ընդ որում, 149-ի մոտ` 2014-ի 11 ամիսների ընթացքում:
Կենտրոնի տնօրենի տվյալներով, վարակի դեպքերի առավելագույն թիվն արձանագրվել է Երեւանի բնակիչների շրջանում 659 դեպք, ինչը կազմում է բոլոր գրանցված դեպքերի 34,3 տոկոսը:
Երկրորդ տեղում Շիրակի մարզն է` 11,3 տոկոս, ապա` Լոռու եւ Սյունիքի մարզերը: Մեր երկրում ՄԻԱՎ-ով ապրող մարդկանց հաշվարկային թիվը կազմում է 3700:
Լուսինե ԲՈՒԴԱՂՅԱՆ
