Այսօր լրագրողների հետ զրույցում Նիկոլ Փաշինյանը հայտարարությամբ հանդես եկավ:
Նա ասաց. «Ցավով եմ արձանագրում, որ հնարավոր չեղավ հավաքել 44 ստորագրություն: Հայտնում եմ, որ նախագիծը մնալու է ԱԺ-ում, որոշակի լրամշակումից հետո այն որպես օրենսդրական նախաձեռնություն կդրվի շրջանառության մեջ: Սա նշանակում է, որ հարցն առնվազն պետք է քննարկվի գլխադասային հանձնաժողովում եւ քվեարկության դրվի նիստում՝ օրակարգում ընդգրկվելու համար:
Վերջին օրերին մամուլում եւ սոցցանցերում տարբեր վարկածներ են առաջ քաշվել՝ նախաձեռնության շարժառիթների մասին: Հարկ եմ համարում պարզաբանել, թե որոնք են նախաձեռնության պատճառները:
1. Վերջին տարիներին քաղաքական խմորումները ներքաղաքական կյանքում առաջացրել են բազմաթիվ անորոշություններ, սույն նախագծով քաղաքացիական պայմանագիր միավորումը հիշեցնում ՀՀ-ում հատկացված աղետալի իրավիճակի առանցքային պատասխանատուների եւ նրանց գործունեության քրեաիրավական բնույթի մասին:
2. Նախագծում հիմնականում արծարծված են հարցեր, որոնց անդրադարձել եմ խորհրդարանական գործունեության ընթացքում: Սա արձանագրում է, որ, խորհրդարանի ամբիոնից բարձրացված հարցերի լուծման գործում լինելու եմ հետեւողական, պատգամավորական լիազորություններս լիարժեք օգտագործելու եմ՝ արծարծված հարցերս հանրային քաղաքական օրակարգում պահելու եւ դրանց լուծմանը հասնելու համար:
3. ԱԺ պատգամավոր եմ ընտրվել ՀԱԿ դաշինքի համամասնական ցուցակով, որի նախընտրական ծրագրի առանցքային դրույթներից մեկը Սերժ Սարգսյանի պաշտոնանկությանը հասնելն է: Վերջին 2.5 տարիների ընթացքում իմպիչմենտի հարցի հարուցման համար հանդես եմ եկել մի քանի անգամ: Հանդես եմ եկել նաեւ հրապարակային՝ «Սիվիլնեթի» եթերից: Ի վերջո համոզվելով, որ այդ ֆորմատներով իմպիչմենտի հարց չի հարուցվելու, սույն նախագծով հարկ եմ համարել վերահաստատել հավատարմությունս ընտրողների առաջ ունեցած պարտավորությանը:
Անհրաժեշտ եմ համարում վերահաստատել, որ պատրաստ եմ միանալ ՀՀ նախագահի պաշտոնը զբաղեցնող Սերժ Սարգսյանին պաշտոնանկ անելու ցանկացած նախաձեռնության, որը կհարուցվի խորհրդարանական որեւէ ուժի կամ պատգամավորի կողմից»:
Հռիփսիմե ՋԵԲԵՋՅԱՆ
