«Մենք այն բոլոր մտահոգությունները եւ երկրում առկա վիճակի նկատմամբ վերաբերմունքը, որն արտահայտել է իր նախագծով պատգամավոր Փաշինյանը, կիսում ենք եւ ընդունում ենք»,- այսօր ԱԺ-ում լրագրողների հետ զրույցում ԲՀԿ մամուլի խոսնակ Տիգրան Ուրիխանյանը Նիկոլ Փաշինյանի ներկայացրած իմպիչմենտի նախագծի հետ կապված այսպիսի կարծիք հայտնեց:
Նրա դիտարկմամբ՝ «Որպեսզի գործընթացը հասնի ավարտին, անհրաժեշտ է երկփուլանոց գործողություն՝ առաջին փուլում 66 ձայնի ապահովմամբ, երկրորդ փուլում՝ 88 ձայնի ապահովմամբ։ Ստացվում է, որ այդ նախաձեռնությունը ապահովելու է ընդամենը մեկ քայլանոց գործողություն եւ այդ իսկ քայլով ավարտվելու է անհաջողությամբ։
Դրա վերաբերյալ ԲՀԿ-ն, գտնելով, որ անհրաժեշտ են, այո՛, գործողություններ, որոնք կտանեն ՀՀ–ն արմատական, ռադիկալ փոփոխությունների ճանապարհով, կբերեն համակարգային փոփոխություն, կբերեն իշխանափոխության, նոր որակի իշխանության ձեւավորման, կապահովեն հրաժարականներ, կիրականացվի այդ գործընթացը համաժողովրդական շարժման է՛լ ավելի ընդլայնման եւ մարդկային ռեսուրսի ուժգին ազդեցության ճանապարհով, որ դրա համար թույլատրելի ենք համարում Սահմանադրությամբ սահմանված բոլոր թույլատրելի ճանապարհները, այդ թվում՝ հանրահավաքներ, զանգվածային ազդեցության տարբեր այլ միջոցներ, նստացույցեր, ժողովրդական ազդեցություն դրսեւորելու բոլոր հնարավոր ձեւերը՝ իշխանափոխությանն ու հրաժարականներին, այդ թվում և առաջին հերթին հասնելու համար։
Բայց դրա համար մենք գտնում ենք, որ անհրաժեշտ է ուժերը մեկտեղել եւ ուզում եմ նշել, որ մեր դռները բաց են, մենք ողջունում ենք ցանկացած մասնակցություն, այդ թվում այն մարդկանց մասով, ովքեր կիսում են, եւ ինչպես ասացի, մենք էլ ենք գնահատում այդ մոտեցումը, այն մտահոգություններն ու խնդիրները, որոնք սույն նախագծում ներառված են»:
Կարդացեք նաև
Տիգրան Ուրիխանյանը խոստացավ ավելի ուշ մանրամասն բացատրել, թե Նիկոլ Փաշինյանի նախաձեռնության մասին, այնուամենայնիվ, ինչ որոշում են կայացրել:
Նշենք, որ այս պահի դրությամբ Նիկոլ Փաշինյանին հաջողվել է հավաքել 3 պատգամավորի ստորագրություն: Ստորագրել է Ալեքսանդր Արզումանյանը, Զարուհի Փոստանջյանը եւ ինքը՝ Նիկոլ Փաշինյանը:
Հռիփսիմե ՋԵԲԵՋՅԱՆ
