Նախկին արտգործնախարար Վարդան Օսկանյանի կարծիքով, Եվրասիական տնտեսական միությանն անդամակցության ընձեռած հնարավորություններից օգտվելու համար Հայաստանը խնդիր ունի հարաբերությունները դնել «հավասարը հավասարի հիմունքների վրա»:
«Մի բան շատ ակնհայտ է, որ գործընթացը շատ սխալ տարվեց, իշխանությունները մի ճանապարհով գնացին, մեկ այլ տեղ հայտնվեցին: Ես չեմ ուզում ասել, որ վատ տեղ հայտնվեցին կամ լավ տեղ: Փաստ է՝ որ մենք հայտնվել ենք այստեղ, բայց, ակնհայտորեն, առաջին օրվանից իշխանությունների որդեգրած ուղղությունը բոլորովին այլ էր և դա տեսանելի էր բոլորի համար», – շաբաթ օրը Մոսկվայի հայ համայնքի հետ ունեցած հանդիպումից հետո «Ազատությանը» տված հարցազրույցում ասաց նախկին արտգործնախարար, «Բարգավաճ Հայաստան» խմբակցության պատգամավոր Վարդան Օսկանյանը: – «Հիմա հայտնվել ենք՝ որտեղ հայտնվել ենք, և սա, համենայնդեպս, որոշ տնտեսական հնարավորություններ է բացում Հայաստանի համար», – հավելեց նա:
Նախկին արտգործնախարարի կարծիքով, ԵՏՄ-ում Հայաստանը երկու խնդիր ունի. առաջինը` հնարավորինս պահպանելով քաղաքական ինքնուրույնությունը, լավագույնս օգտվել ընձեռված տնտեսական հնարավորություններից, և երկրորդ` լինելով այդ միությունում, չփակել այլ հնարավորությունները:
Ազա Բաբայան
Կարդացեք նաև
Նյութի մանրամասները կարդացեք «Ազատություն» ռադիոկայանի կայքում
