Եղվարդի մանկապարտեզի տնօրենն էլ է երեխաների սնունդից կերել
Եղվարդի եւ Երեւանի «Նորք» ինֆեկցիոն հիվանդանոց տեղափոխված թիվ 1 մանկապարտեզի երեխաների թունավորման պատճառն, ամենայն հավանականությամբ, դիզենտերիայի հարուցիչն է: Չնայած, առողջապահության ոլորտի մասնագետները ավելի ստույգ կարող են ասել վաղը՝ երբ պատրաստ կլինեն լաբորատոր հետազոտությունների արդյունքները: 
Aravot.am-ի հետ զրույցում Եղվարդի թիվ մեկ մանկապարտեզի դաստիարակը պատմեց, որ երեխաների ինքնազգացողությունը սկսել է վատանալ ուրբաթ եւ հինգշաբթի օրվանից. «Ուրբաթ օրը, երեխաներից մեկը եկավ, ասաց, որ լավ չեմ զգում ինձ: Ես անմիջապես ջերմությունը չափեցի` տեսա որ ջերմությունը 38.5 է զանգել եմ, երեխայի մայրիկը եկել երեխային տարել է, հետո երեկոյան իմացանք որ մեծ թվով երեխաներ տեղափոխվել են հիվանդանոց»:
Նշենք, որ թունավորման ախտանիշներով երեկ Եղվարդի Նաիրիի բուժկենտրոն են տեղափոխվել Եղվարդի թիվ 1 մանկապարտեզի 60-ից ավել երեխա:
Հիվանդանոցում տեղեկացանք, որ առողջապահության նախարարի զանգից անմիջապես հետո «Նորքի» ինֆեկցիոն հիվանդանոցի տնօրեն Արա Ասոյանը մեկնել է Եղվարդ;
Կարդացեք նաև
Հիվանդ երեխաների թիվը անընդհատ ավելանում է. 19 երեխայի սուր ինֆեկցիայով տեղափոխել են Երեւան:
Ըստ մանկապարտեզի աշխատակիցների, երեխաներից մի քանիսը իրենց վատ են զգացել հինգշաբթի օրը, իսկ ուրբաթ երեխաները հոսպիտալացվել են զանգվածային թունավորման գրանցմամբ: 
«Իմ կարծիքը միանշանակ այն է, որ ջուրը չի կարող լինել, նաեւ բացառում եմ օդակաթիլային ճանապարհը, հիվանդներին իմ վերլուծելով դիզինտերիայի պատկեր եմ ենթադրում, իսկ լաբորատոր անալիզների պատասխանները ստանալուց հետո ավելի պարզ կլինի»,-ասաց «Նորքի» ինֆեկցիոն հիվանդանոցի տնօրեն Արա Ասոյանը:
3.5 տարեկան Միլենայի մայրը՝ Ագապի Թադեւոսյանը պատմում է, որ փոքրիկը գիշերը արթնացել է՝ թե փորիկը ցավում է. «Մտածեցի մրսածություն է անմիջապես ջերմությունը բարձրացավ, փսխում առաջացավ ու անմիջապես փորլուծություն, անընդհատ զառանցելով, տենդի մեջ, ջերմությունը չէր իջնում, իսկ գիշերը 3-ի մոտ երբ արյուն նկատեցինք անմիջապես տեղափոխեցինք հիվանդանոց: Հիմա շատ լավ է, ջերմությունը իջել է»:
Մեկ այլ երեխայի մայր էլ մտածելով, թե երեխան մրսածություն ունի կես հաբ դեղ է տվել. «Հետո ջերմությունը չի իջել, սկսվել է փորլուծություն նոր տեղափոխել են հիվանդանոց»:
Ահազանգից անմիջապես հետո ՀՀ քննչական կոմիտեի Կոտայքի մարզային քննչական վարչությունում նախապատրաստվել են նյութեր, որոնց հիման վրա հարուցվել է քրեական գործ:
Տեղեկացանք, որ այս մանկապարտեզը վերջերս է վերանորոգվել, որտեղ 400-ից ավել երեխա է հաճախում, ծնողներն ասացին, որ երբեք դժգոհության առիթ չեն ունեցել: Մանկապարտեզը վճարովի է `5-6.5 հազար դրամ`կախված ամսվա սննդի ընտրանուց: Հինգշաբթի եւ ուրբաթ օրերի ճաշացանկում եղել են կաթնաշոռ, թթվասեր, պյուրե, նրբերշիկ, սպաս, «բորշչ»: Սնունդն, ըստ մանկապարտեզի փոխտնօրենի, միշտ եղել է վերահսկողության տակ:
Եղվարդի թիվ 1 մանկապարտեզի փոխտնօրեն Տիրուհի Ավետիսյանն էլ ասաց, որ Ճաշը պատրաստելուց հետո պարտադիր քույրը համտեսում է, հետո նոր երեխաներին են տալիս. «Այդ օրը ես էլ եմ կերել այն ամենից ինչ մատուցվել է երեխաներին»:
Արա Ասոյանի՝ հիվանդանոց այցելության ժամանակ, այսօր էլ եւս երեխա բերել էին հիվանդանոց. «Մեկին հետ տուն ուղարկեցինք, հիմա ավելի շատ նաեւ տագնապն է, բայց ավելի լավ է բերեն մենք տեսնենք, քան ինչ-որ մեկին բաց թողնենք: Այժմ երեխաների թիվը հասել է 63- ի Երեւան տեղափոխման կարիք չկա»,-ասաց հանրապետության գլխավոր վարակաբանը:
Մանկապարտեզում կատարվել է զննություն, փորձանմուշներ են վերցվել մանկապարտեզում առկա պահեստավորված սննդի տեսակներից, օրվա ճաշատեսակից։ Առգրավվել են մանկապարտեզին մատակարարված սննդի փաստաթղթերը` կնքվել խոհանոցի դռները: Այժմ մանկապարտեզի գործունեությունը դադարեցված է:
Առավոտ
