Ինչպես հայտնի է՝ կառավարությունը մոտ 444 գյումրեցի անօթևանների հարցերը որոշել է լուծել նրանց համար ոչ թե նոր բնակարաններ կառուցելով, այլ բնակարանների գնման վկայագրեր տրամադրելով: Այսօր մեկնարկեց ԲԳՎ ծրագիրը. Շիրակի մարզպետ Ֆելիքս Ցոլակյանը 10 ընտանիքի տրամադրեց բնակարանների գնման վկայագրեր:
Aravot.am-ը Շիրակի մարզպետից հետաքրքրվեց, եթե Մուշ 2/2 նորակառույց թաղամասի բնակարանները դեռ սեփականաշնորհված չեն, ինչպե՞ս է ԲԳՎ ծրագիրը իրեն արդարացնելու. չէ՞ որ անօթևան ընտանիքների հիմնական հույսն այն է , որ այս նոր թաղամասի տները հանվեն վաճառքի, իրենք էլ գնեն: «Ձեր հարցը շատ տեղին է, որովհետև այդ հարցով մենք հիմա զբաղվում ենք: Կարելի է ասել՝ եթե ոչ ամեն օր, երկու օրը մեկ ես խոսում եմ քաղաքաշինության նախարարի հետ, որ արագացնեն էդ պրոցեսը:
«Գլենդել հիլզ» կազմակերպությունը պետք է տա իրենց, իրենք էլ դա պետք է վերցնեն սեփականության իրավունքով, որից հետո սեփականաշնորհվի ու բնակիչներին պիտի տրվի: Հիմա ես խոստացել եմ, որ մինչև դեկտեմբերի կեսերը էդ հարցը պիտի փակվի: Սա շատ կարևոր հարց է, որովհետև մենք գիտենք, որ Մուշ 2 թաղամասում է հիմնական բնակֆոնդը, որտեղ և պետք է գնումները կատարվեն, Գյումրու մյուս տեղերում էդքան բնակարան որտեղի՞ց կլինի: Հորդորս է մարդկանց, նրանց, ովքեր իրենց բնակարանը վաճառելու են. օգտվելով առիթից՝ չթանկացնեն, մեկ է՝ մենք դրանից ավել փող չենք կարողանալու տալ, դա է սահմանը, որոշված, պրծած է, սահմանի մեջ պետք է տեղավորվեն», ասաց Շիրակի մարզպետը:
Նունե ԱՐԵՎՇԱՏՅԱՆ
