Ուկրաինացի լրագրող Դմիտրի Վոլկովը մեկնաբանել է Ղարաբաղ այցելելու պատճառով իր անվան շուրջ բարձրացած աղմուկը: «1+1» հեռուստաալիքի համար պատրաստած «15 հանրապետություններ» հերթական հաղորդման առնչությամբ Ուկրաինայում Ադրբեջանի դեսպանատունը բողոք էր ուղարկել Կիևին՝ ծրագրում Հայաստանն ու Ղարաբաղը համակրանքով ներկայացնելու համար, իսկ Վոլկովին և հաղորդման մյուս համահեղինակին՝ Կոնստանտին Անդրիյուկին «պերսոնա նոն գրատա» էր հայտարարել:
Ինչպես փոխանցում է «Oxu.az»-ը, Վոլկովը նշել է, որ ինքը նկարահանել է այն, ինչ տեսել է ու խորհուրդ է տվել՝ իր գործում ոչ մի դիտավորություն չփնտրել, իսկ Ադրբեջանի ԱԳՆ-ին մեղադրել է, որ իրենց հարցումներին չեն չպատասխանել:
«Ձեռք մի տվեք Կոլոմոյսկիի («1+1» հեռուստակայանը պատկանում է գործարար Իգոր Կոլոմոյսկիին) ալիքին, ու հատկապես ամբողջ Ուկրաինային: Բոլոր բողոքներն ինձ ուղղեք», – գրել է նա, – «Ես նկարահանել եմ այն, ինչ տեսել ու լսել եմ: Եթե ինչ-որ մեկին վիրավորել եմ, ներողություն եմ խնդրում, չէի ուզում այդպես լիներ: Պետք չէ այստեղ դավադրությունների տեսություններ ստեղծել (…) Ադրբեջանը հրաշալի երկիր է: Մենք այնտեղ ընկերներ ենք ձեռք բերել, բայց, այդուհանդերձ, Ադրբեջանի ԱԳՆ-ը մեր հարցումներից որևէ մեկին չի պատասխանել, իսկ Հայաստանինը՝ պատասխանել է»:
Պատրաստեց Հովհաննես ԻՇԽԱՆՅԱՆԸ
Կարդացեք նաև
