«Չեմ կարծում, որ այդ նախաձեռնությունը իրական հիմքեր ունի, չեմ էլ կարծում, որ այդ նախաձեռնությունը որևէ հաջողություն կունենա»,- այսօր խորհրդարանում, լրագրողների հետ զրույցում ասաց ԱԺ փոխխոսնակ Էդուարդ Շարմազանովն`անդրադառնալով ԱԺ պատգամավոր Նիկոլ Փաշինյանի`Սերժ Սարգսյանի իմպիչմենտի նախաձեռնությանը:
Լրագրողներից մեկի հարցին`արդյո՞ք դա թեսթ չէ եռյակի համար, նա ասաց, որ չի ցանկանում անդրադառնալ եռյակին ու նրա թեսթերին:
Անդրադառնալով արդեն եռյակի`ԲՀԿ, ՀԱԿ եւ «Ժառանգություն», իշխանափոխության պահանջին, ԱԺ փոխխոսնակն ասաց, որ ժամանակ չունի անդրադառնալ, թե ո՞վ եւ ի՞նչ իշխանափոխության պահանջ է ներկայացնում. «Հանրապետականն ունի իր օրակարգը, որով էլ շարժվում է: Մեր խնդիրը ոչ թե այս կամ այն ուժի հետ աննպատակ քննարկումներն են, այլ նպատակային քննարկումներն են, ինչն էլ առաջարկել ենք: Հայաստանում անհրաժեշտ են համակարգային փոփոխություններ, որոնք պետք է լինեն երկխոսության, կոնսենսուսի հիման վրա, սահմանադրական փոփոխությունների ճանապարհով»:
ԱԺ փոխխոսնակը կրկնեց նախկինում արտահայտած իր դիրքորոշումը, որ Հայաստանում համաժողովրդական շարժում չի տեսնում, քանի որ այն ուղղակի չկա: «Դասական առումով եռյակ էլ չկա, որովհետև Հայաստանի համար ամենակարևոր հարցերի շուրջ այդ քաղաքական ուժերը ունեն տրամագծորեն տարբեր կարծիքներ: Անգամ տրամագծորեն տարբեր կարծիքներ ունեն իշխանության հետ երկխոսելու հարցի շուրջ: Էլ չեմ ասում, որ եռյակում կա քաղաքական ուժ, որի ներսում տարբեր կարծիքներ կան նույն ԵՏՄ-ին անդամակցելու հարցով»,- ասաց Էդուարդ Շարմազանովը:
Կարդացեք նաև
Նելլի ԳՐԻԳՈՐՅԱՆ
