«Ինչո՞ւ պետք է Նորք-Մարաշի համայնքի ղեկավարը ստանա նույն աշխատավարձը, ինչ` Նոր Նորքի վարչական շրջանի ղեկավարը, որը քրտնաջան աշխատում է: Կամ Նուբարաշենի վարչական շրջանի ղեկավարը, ոչինչ չանելով, նույն աշխատավարձն է ստանում՝ ինչ Նոր Նորքինը»,-այսօր Երեւանի քաղաքապետարանում տեղի ունեցող Երեւանի ավագանու նիստին ասաց «Բարեւ Երեւան» խմբակցության ավագանու անդամ Արթուր Գասպարյանը, երբ քվեարկության էր դրված տեղական ինքնակառավարման մարմնի 7 հազար աշխատակիցների աշխատավարձերի բարձրացման հարցը:
«Տիկի’ն Պողոսյան, դուք օպերայում չեք գտնվում, երբ Օպերայում կգտնվեք նոր կխոսեք»,-Թամար Պողոսյանին ասաց Երեւանի քաղաքապետ Տարոն Մարգարյանը, երբ տիկին Պողոսյանը, պահանջելով ձայնի իրավունք եւ չստանալով, տեղից իր դժգոհությունն էր հայտնում այդ նախագծի վերաբերյալ: Նրա խոսքերով, նախագծում այլ թիվ է նշված, բայց ավագանուն հրամցնում են 7000 աշխատակցի աշխատավարձի բարձրացման հարցը:
Տարոն Մարգարյանի եւ Թամար Պողոսյանի բանավեճը` տեսանյութում
Երբ ավագանու նիստը վարող Տարոն Մարգարյանն այդպես էլ ձայնի իրավունք չտվեց տիկին Պողոսյանին, նա ԲՀԿ խմբակցության ավագանու անդամներին հորդորեց դուրս գալ` չմնալով մյուս հարցերի քննարկմանը:
Կարդացեք նաև
Մինչ այդ, այս նախագծին դեմ քվեարկեցին 17 ավագանու անդամ, որոնց թվում էին նաեւ «Բարեւ Երեւանի» ավագանու անդամները:
Թամար Պողոսյանի խոսքերով, քաղաքապետարանի այս որոշումը բյուջեի վրա բավականին ծանր բեռ է դնում. «Մենք քաղաքական պատասխանատվություն ենք կրում այս որոշման համար: Ինձ համար շատ կարեւոր որոշում էր: Ամբողջ խմբակցության հանդեպ այսպիսի վերաբերմո՞ւնք: Հնչում է յոթ հազար թիվը, սակայն քվեարկության են դնում մի բան, որը նախագծով չկա: Հիմա այս սոցիալական շերտին ուղղում են մեր դեմ: Ասում են` վերջին 3-4 տարում Երեւանի քաղաքապետարանի աշխատակիցների աշխատավարձը չի բարձրացել: 2013 թվականի հունիսին, երբ որ մենք հաստատել ենք այս հարցերը, 2012 թվականից աշխատավարձերը հիսուն տոկոսով ավելացել են»:
Լուսինե ԲՈՒԴԱՂՅԱՆ
