«Սա ադրբեջանական կողմին պատասխան չէր, սա պետության պարտականությունն էր»,- այսօր` նոյեմբերի 26-ին, «Ֆորում» մամլո ակումբում լրագրողների հետ հանդիպման ընթացքում, անդրադառնալով խոցված ուղղաթիռի օդաչուների մարմինների տարհանմանը, հայտարարեց Մարդու իրավունքների առաջին պաշտպան, «Ընդդեմ իրավական կամայականությունների» հասարակական կազմակերպության նախագահ Լարիսա Ալավերդյանը:
Նա նշեց, որ ճիշտ է համարում, որ հենց Արցախն է իրականացրել այդ հատուկ գործողությունը, քանի որ Հայաստանի Հանրապետությունը անթաքույց համագործակցում է Լեռնային Ղարաբաղի Հանրապետության հետ, մասնավորապես` բանակի:
Տիկին Ալավերդյանը հավելեց, որ Ադրբեջանին պատասխան տալու հարցում չպետք է շտապել. «Պատասխանը պետք է լինի համարժեք, անգամ, եթե անհամաչափ է, եւ չպետք է նյարդային շարժումների նման լինի: Այն պետք է լինի հավասարակշռված եւ արժանապատիվ, այսինքն` չնսեմացնի հայկական կողմերը»:
Լարիսա Ալավերդյանը ողջունեց «Ժառանգություն» կուսակցության խոսնակ, Երեւանի ավագանու «Բարեւ Երեւան» խմբակցության անդամ Դավիթ Սանասարյանի քայլը:
Կարդացեք նաև
Հիշեցնենք Դավիթ Սանասարյանը ԵԱՀԿ-ի երեւանյան գրասենյակի առջեւ հացադուլ էր հայտարարել` պահանջելով պարզել օդաչուների ճակատագիրը եւ վերադարձնել նրանց հայկական կողմին:
«Հենց այդ քայլը ցույց տվեց, որ մեր պաշտպանը մենք ենք, եւ ոչ միայն բանակը, այլեւ հասարակությունը եւս: Մեր իշխանությունները պարտավոր են նույնչափ արդարություն իրականացնեն երկրի ներսում, ինչքան մենք պահանջում ենք դրսից: Այդ ժամանակ մենք հստակ կասենք` իրապես պաշտպանված ենք, որովհետեւ պաշտպանվածությունը ժողովրդի վստահությունն է իշխանությանը»,-ասաց Լարիսա Ալավերդյանը:
Ամի ՉԻՉԱԿՅԱՆ
