«Հայաստանում ամեն երրորդ կին հոգեբանական բռնության է ենթարկվում տղամարդու կողմից»,- այս տվյալները ներկայացնում է «Հասարակություն առանց բռնության» հ/կ անդամ Աննա Նիկողոսյանը:
Ըստ նրա. «Հայաստանում ամենատարածվածը հոգեբանական բռնությունն է, որը տարբեր հետազոտությունների համաձայն 66 տոկոս է կազմում: Այնուհետեւ, ֆիզիկական բռնությունն է, որը թեեւ պաշտոնական տվյալներով կամ համապետական հարցումներով տասը տոկոս է կազմում, բայց հասարակական կազմակերպությունների տվյալներով, մի քանի անգամ ավելի շատ է»:
Աննա Նիկողոսյանի խոսքով, ընտանեկան բռնությունները մեծ տարածում ունեն Հարավային Կովկասում, այս տարի տասնմեկ կին է ընտանեկան բռնության հետեւանքով մահացել Վրաստանում եւ Հայաստանում.«Մենք հետեւում ենք դատական գործերին, որ չկոծկվեն: Այս տարի ոստիկանությունը բացահայտել է ընտանեկան բռնության 1500 դեպք, թե դրանցից քանիսն են պատժվել, կդժվարանամ ասել: Բռնության դեպքերը կանխելու Երկու տարբերակ կա. իրազեկվածության մակարդակի բարձրացումը եւ օրենսդրական դաշտի բարելավումը: Բայց, քանի որ իրազեկվածության մակարդակի բարձրացումը շատ ավելի երկարաժամկետ գործընթաց է, հարկավոր են գործողություններ, որոնք միանգամից դրական փոփոխություններ կմտցնեն: Իսկ այդ դեպքում օգնության է գալիս օրենքը, եթե լինի, ապա փոփոխություններն ավելի արագ ու զգալի կլինեն, ընտանեկան բռնություններն անպատիժ չեն մնա»:
Հիշեցնենք, որ Ընդդեմ կանանց բռնության կոալիցիայի անդամներն այսօր Ազգային ժողովի 131 պատգամավորի նամակներ փոխանցեցին: Խորհրդարանի յուրաքանչյուր պատգամավորի համար նախատեսված ծրարում ընտանեկան բռնությունների կանխարգելման մասին օրենքի վերամշակված նախագիծն էր, որը մի քանի տարի առաջ մերժվեց Ազգային ժողովի կողմից:
Այդ ակցիան կանանց իրավունքները պաշտպանող հ/կ-ներից կազմված կոալիցիան անցկացրեց կանանց նկատմամբ բռնությունների վերացման միջազգային օրվան նվիրված միջոցառումների շրջանակում:
Արփինե ՍԻՄՈՆՅԱՆ
Կարդացեք նաև
