Ֆրանսիայի նախագահ Ֆրանսուա Օլանդը հրաժարվել է Ռուսաստանին մատակարարել առաջին «Միստրալ» դասի ուղղաթիռակիր նավը՝ Ուկրաինայում ստեղծված իրավիճակի պատճառով, ասված է Ելիսեյան պալատի տարածած հաղորդագրության մեջ, փոխանցում է «ՌԻԱ Նովոստի»-ն:
«Հանրապետության նախագահը կարծում է, որ Ուկրաինայի այժմյան վիճակը դեռ թույլ չի տալիս առաջին «Միստրալը» փոխանցել Ռուսաստանին: Ուստի նա անհրաժեշտ է համարել, որպեսզի մինչև նոր կարգադրությունն ուսումնասիրվի, հետաձգել Ռուսաստանին առաջին «Միստրալ»-ը մատակարարելու հայտը», – ասված է հաղորդագրության մեջ: Այլ մանրամասներ նախագահի աշխատակազմից չեն հաղորդել:
Առաջին «Միստրալ» ուղղաթիռակիրը՝ «Վլադիվոստոկ» նավը, Ռուսաստանի ռազմածովային ուժերին պետք է փոխանցվեր դեռ նոյեմբերի 14-ին, սակայն փոխանցումը տեղի չէր ունեցել:
ՌԴ պաշտպանության փոխնախարար Յուրի Բորիսովը, «ՏԱՍՍ»-ի փոխանցմամբ, հայտնել է, որ եթե «Միստրալ»-ը չփոխանցվի ռուսական կողմին, ապա Ռուսաստանը կգործի պայմանագրի համաձայն ու Ֆրանսիայի դեմ դատական գործընթաց կսկսի:
Կարդացեք նաև
Ավելի վաղ Ֆրանսիայի արտաքին գործերի նախարար Լորան Ֆաբիուսը հայտնել էր, որ նավի փոխանցման համար անհրաժեշտ պայմանները կատարված չեն:
Պատրաստեց Հովհաննես ԻՇԽԱՆՅԱՆԸ
