«Նոյյան տապան» մամլո սրահում այսօր՝ նոյեմբերի 25-ին, .հայ դոմեյնի գրանցման կապակցությամբ հրավիրված ասուլիսի ընթացքում Aravot.am-ը հետաքրքրվեց մեդիափորձագետ Սամվել Մարտիրոսյանից, թե իր կարծիքով մեսրոպատառ .հայ դոմեյնի տարածմանը կարո՞ղ է խոչընդոտել այն հանգամանքը, որ համացանցում օգտատերերի գերիշխող մասը հայերեն տեքստը գրում է լատիներեն տառերով:
Սամվել Մարտիրոսյանը պատասխանեց, որ իրավիճակը բավականին փոխվել է, մեսրոպատառ գրելը ավելի դյուրին է դառնում եւ հայերեն տեքստը մեսրոպատառ գրող օգտատերերի թիվը շատանում է. «Սմարթֆոնների քանակն այնքան է մեծացել, որ մարդիկ նույնիսկ միմյանց մեսրոպատառ կարճ հաղորդագրություններ են ուղարկում, ինչը չի վերաբերում պետական կառույցներին, որոնք շարունակում են մեզ տարօրինակ հաղորդագրություններ ուղարկել, որոնց իմաստը միշտ չէ, որ հասկանալի է՝ լատինատառի պատճառով»:
Սամվել Մարտիրոսյանի կարծիքով՝ լատինատառ հայերենը, իրականում, ընդհանուր խնդիր է, որովհետեւ այդպես ո՛չ հայերենն է հասկացվում, ո՛չ էլ այն զարգանում է. «Այստեղ խնդիր կա, որ հայերեն բովանդակությունը նաեւ այլ լեզուներով լինի, այս խնդիրը գնալով մեծանալու է: Այսինքն՝ մենք մի կողմից զարգացնելու ենք հայերենը, ինչը դրական է, մյուս կողմից էլ կարող ենք գնալ ինքնամեկուսացման: Այդ պատճառով՝ կարեւոր է նաեւ, որ հայերեն բովանդակությամբ տեքստը այլ լեզուներով թարգմանվի եւ հակառակը, որպեսզի չմեկուսանանք»:
Ամի ՉԻՉԱԿՅԱՆ
