Կապանի մարմնամարզության մանկապատանեկան մարզադպրոցի սաները տարիներ շարունակ տարվա ցուրտ ամիսներին մարզվում են չջեռուցվող դահլիճում: Մարզադպրոցի ջեռուցման խնդրի մասին բազմիցս է բարձրաձայնվել, բայց մինչեւ օրս անհրաժեշտ գումարներ չի գտնվել ջեռուցման խնդիրը լուծելու համար, ուստի այս տարի էլ մարզիչներն իրենց սաների հետ կշարունակեն պարապմունքներն անցկացնել ցուրտ մարզադահլիճում: Մարզադպրոցի ջեռուցման խնդրի մասին մարզիչները բարձրաձայնել են նաեւ օգոստոս ամսին Կապան այցելած սպորտի եւ երիտասարդության հարցերի նախարար Գաբրիել Ղազարյանի հետ կայացած հանդիպման ժամանակ`
Մարզադպրոցը չի ջեռուցվելու ոչ այս ձմռանը, ոչ էլ` եկող տարի: Այս մասին տեղեկացանք Կապանի քաղաքապետ Աշոտ Հայրապետյանից: Նրա խոսքով` եկող մեկ տարվա ընթացքում մարզադպրոցի ջեռուցման խնդիրը լուծելու որեւէ ծրագիր չկա, պատճառը` ֆինանսական միջոցների բացակայությունն է: Այս տարի համայնքային բյուջեով եւ Քաունթերփարթ ինթերնեյշնլ միջազգային կազմակերպության միջոցներով` ընդհանուր 21 մլն 684 հազար դրամով նորոգվել եւ վերազինվել է մարզադպրոցը, բայց ջեռուցում ապահովելու համար գումարներ չգտնվեցին:
«Այն 21 մլն դրամը, որ ծախսվեց դպրոցի վրա, խիստ անհրաժեշտություն էր, որովհետեւ դպրոցի հիմքերը խարխուլ էին, լուրջ վթարային իրավիճակ էր ստեղծվել, մինչեւ ջեռուցման խնդրին անդրադառնալը` մենք հարկ համարեցինք դպրոցի հիմքը կարգի բերել: Դպրոցը մասնակի նորոգման ենթարկեցինք. նորոգվեցին սանհանգույցները, հանդերձարանները, փոխվեցին լուսամուտներն ու դռները, ինչը թույլ տվեց ձմռանը չդադարեցնել պարապմունքները, պրոցեսը շարունակել»,- ասաց Կապանի քաղաքապետը եւ հավելեց, որ ջեռուցման խնդիր կա նաեւ քաղաքի մյուս` Դավիթ Համբարձումյանի անվան մարզադպրոցում: Թեեւ տվյալ մարզադպրոցը ջեռուցման կաթսա ունի, բայց այն չի շահագործվում, քանի որ ջեռուցում ապահովելու համար կրկին գումար չկա:
Կարդացեք նաև
«Մենք միջոցներ ենք տրամադրում եւ կառուցում ջեռուցման կաթսա, դրանք մեծ գումարենր են պահանջում, այնուհետեւ մենք չենք կարողանում ջեռուցման խնդիր լուծել, նաեւ ֆինանսկան միջոցների սակավության պատճառով դա չեմ համարում տեղին ներդրում:
Առաջիկա մեկ տարվա ընթացքում Կապանի մարմնամարզության մանկապատանեկան մարզադպրոց ջեռուցման կաթսա տեղադրելու խնդիր դեռեւս չենք դրել: Այն դպրոցներում, որտեղ ունենք ջեռուցման հնարավորություն եւ չենք իրականացնում, առաջնահերթ, այդ միջոցները կուղղվեն կաթսայատուն ունեցող դպրոցների ջեռուցմանը»,- նշեց Աշոտ Հայրապետյանը:
Կապանի մարմնամարզության մանկապատանեկան մարզադպրոցի մարզիչ Լուսինե Առստամյանը մեզ հետ ունեցած զրույցում նշեց, որ շուրջ 24 տարի է աշխատում է մարզադպրոցում, դրանից առաջ էլ տարիներ շարունակ մարզվել է չջեռուցվող դահլիճում: Զրուցակիցս փաստում է, որ ցրտերն ընկնելուն պես երեխաների հոսքը նվազում է, ծնողները երեխաներին պարապմունքների չեն ուղարկում, քանի որ ցուրտ պայմաններում մարզվելուց հետո մրսում ու հիվանդանում են:
«24 տարի է աշխատում եմ արդեն այս պայմաններում: Ցրտերն ընկնելուն պես` դահլիճի խոնավությունը զգացվում է, այդ ամենը մարզիչներիս վրա էլ է անդրադառնում: Ես ժամը 14:00-ից մինչեւ 20:00-ն այստեղ եմ լինում` փոքրերի, միջինների ու մեծերի խումբ ունեմ, ամենակրտսեր սանս 3 տարեկան է: Երեխաներին չենք թողնում մի վայրկյան կանգնեն, ստիպում ենք շարժվել, իրենց հետ ցատկում ենք, խաղերի տեսքով վարժություններ ենք կազմակերպում, որ տաքանան: Եղանակները ցրտելուն զուգահեռ` հաճախողների թիվը նվազում է, երեխաները սկսում են շատ բացակայել, իսկ 1 օրվա բացակայությունն անգամ անդրադառնում է երեխայի մարզական պատրաստվածության վրա. մկանները փակվում են, էլ չասեմ մեկ շաբաթվա կամ մեկ ամսվա բացակայության մասին: Պարապմունքների բացթողումն էլ իրենց հերթին անդրադառնում են մրցումների արդյունքների վրա», -ասաց մարզիչը եւ հավելեց, որ բացի ջեռուցման խնդրից` այլ դժվարությունների էլ են բախվում:
Ֆինանսական խնդիրների պատճառով` սաները բազմաթիվ մրցումների չեն կարողանում մասնակցել, մայրաքաղաքից հեռու գտնվելով` ծրագրերից հետ են ընկնում, մարզիչներն էլ վերապատրաստման տարբեր դասընթացների մասնակցելու հնարավորություն միշտ չեն ունենում եւ այլն:
«Մրցումների ժամանակ ենք իմանում նոր ծրագրերի մասին: Երեւանում երեխաները գումար գտնում են` Եվրոպա գնալու համար, իսկ մեր երեխաները նույնիսկ Գյումրիում անցկացվող միջազգային մրցումների մասնակցելու համար գումար չկարողացան գտնել: Դիմում ենք տարբեր հովանավորների, քաղաքապետարանն է ֆինանսավորում, բայց բազմաթիվ մրցումների մասնակցելու հնարավորությունից էլ զրկվում ենք: Պետք է երեխաները գնան մասնակցեն, իրենց աչքով տեսնեն, ոգեւորվեն, ուզենան ավելի մեծ բարձրունքների հասնեն, իսկ Կապանում պայմանները բավարար չեն այդ ամենի համար: Մեր սպորտաձեւը շատ մանրուքներ է պահանջում…», – հավելեց Լուսինե Առստամյանը եւ նշեց, որ անկախ սուղ պայմաններից ու եղած հնարավորություններից` Կապանի մարմնամարզության մանկապատանեկան մարզադպրոցի սաները բոլոր ժամանակներում հաջողություններ են գրանցել եւ լավ արդյունքներ ապահովել:
Մերի ՍՈՂՈՄՈՆՅԱՆ
