Հովհ. Թումանյանի անվան տիկնիկային թատրոնը 15 օրում երկու միջազգային փառատոնի է մասնակցել, երկուսից էլ դատարկաձեռն չեն վերադարձել:
Նախ` մասնակցել են Թայլանդում կայացած միջազգային տիկնիկային փառատոնին, ու Բանգոկում երկու անգամ խաղացել Թումանյանի «Անխելք մարդը». ընդ որում՝ մեկ անգամ՝ անգլերեն են խաղացել՝ դահլիճում, մեկ անգամ էլ՝ հայերեն՝ բացօթյա, որին ներկա է եղել 1600 հանդիսական: «Մեծ տարբերություն չկար՝ անգլերե՞ն խաղացինք, թե՞ հայերեն, երկու դեպքում էլ ներկայացումը շատ լավ ընդունվեց: Ոգեւորությամբ էին դիտվում հատկապես այն կտորները, որոնցում հայկական երգեր կային»,-փաստում է թատրոնի տնօրեն, ռեժիսոր Ռուբեն Բաբայանն ու հավելում, որ փառատոնն ուներ ազգային գծերը ցույց տալու ուղղվածություն:
Ինչ վերաբերվում է «Անխելք մարդը» ներկայացմանը, ռեժիսորի խոսքով. «Արդեն 10-րդ միջազգային փառատոն ենք տանում «Անխելք մարդը», եւ ամեն տեղ ասում են՝ այս պատմությունը մեր մասին է: Փաստորեն անխելք մարդու խնդիրը համընդհանուր է»: Թայլանդից հետո մեր տիկնիկայինը մեկնել է Գերմանիա` Թեսփիսի մոնոներկայացումների փառատոնին, որին տարբեր երկրներից եւս 17 թատերախումբ էր մասնակցում: Տիկնիկային թատրոնում ըստ Նատալի Ֆիլիոնի գործի բեմադրված՝ Նարինե Գրիգորյանի «Դզին» մոնոներկայացումը արժանացել է գերմանական փառատոնի հատուկ մրցանակին, որը շնորհվում է մի քանի փառատոնների նախագահների անունից:
Պարոն Բաբայանը վստահեցնում է, որ «Դզինը» եւ հրաշալի է ընդունվել, դրան հետեւել են հրավերքներ Իսրայելից եւ Լիտվայից:
Կարդացեք նաև
Գոհար ՀԱԿՈԲՅԱՆ
