Նոյեմբերի 19-ին, ժամը 10.40-ի սահմաններում Նոյեմբերյան բժշկական կենտրոն է տեղափոխվել Կողբ գյուղից աղջնակ, որը ծնվել է 2014թ. սեպտեմբերի 3-ին: Բժշկական կենտրոնի տնօրեն Արթուր Գաբրիելյանը եւ փոխտնօրեն, մանկաբույժ Աղասի Մահտեսյանն ասացին, որ ցավում են երեխայի մահվան կապակցությամբ, սակայն նրա կյանքը հնարավոր չէր փրկել, քանի որ երեխան իրենց մոտ է տեղափոխվել մահացած վիճակում:
Ա. Մահտեսյանին հարցրինք, թե ինչն էր երեխայի մահվան պատճառը: Նա ասաց, որ ինքը չգիտի, քանի որ դրա համար պետք է դիահերձում կատարվեր: Նա հայտնեց, որ երեխան հիպոտրոֆիկ հիվանդ է եղել:
Նոյեմբերյանի ԲԿ-ի տնօրեն Ա. Գաբրիելյանը հայտնեց, որ երեխայի վրդովված հարազատները վնասել են հիվանդանոցի գույքը, հարվածել դռանը, ահաբեկել բժիշկներին, ինչի կապակցությամբ ինքը դիմել է ոստիկանություն:
Ոսկան ՍԱՐԳՍՅԱՆ
