Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի նախագահությամբ այսօր նշանակվել էր Գոռ Առաքելյանի, Վալերի Հովհաննիսյանի եւ Ներսես Մելքոնյանի դեմ հարուցված քրեական գործով դատական անդրանիկ նիստը: Նրանց պաշտպանությունը ստանձնել են Արմեն Խաչատրյանը, Երեմ Սարգսյանը, Արայիկ Ալվանդյանը եւ Վարդուհի Էլբակյանը: Սակայն դատարան չէին ներկայացել 3 տուժողները՝ Մյասնիկ Հայրապետյանը, Արմինա Բադալյանը, Մնացական Սուքիասյանը: Քանի որ Մնացական Սուքիասյանից դատարանը որեւէ պատշաճ տեղեկություն չէր ստացել, ուստի նրա բացակայությունը համարվեց անհարգելի եւ մեղադրողը միջնորդեց, որպեսզի բերման որոշում կայացվի տուժողի նկատմամբ: Դատարանը կայացրեց այդ որոշումը: Հաջորդ դատական նիստին տուժողը կբերվի դատարան ոստիկանության համապատասխան ստորաբաժանման կողմից:
Մինչ դատական նիստը սկսվելը, փոխվեց նիստերի ավանդական դահլիճը, նիստը տեղափոխվեց ավելի մեծ սրահ:
Դատական նիստը սկսվեց 45 րոպե ուշացումով, քանի որ ամբաստանյալ Վալերի Հովհաննիսյանի համար շտապօգնություն էր կանչվել:
Կարդացեք նաև
Դատական հաջորդ նիստը նշանակվեց դեկտեմբերի 3-ին:
Ռուզան ՄԻՆԱՍՅԱՆ
