Aravot.am-ն այսօր «Քրիստոնեա-ժողովրդական վերածնունդ» կուսակցության նախագահ Սոս Գիմիշյանից հետաքրքրվեց, թե ի՞նչ կարծիք ունի Ռուսաստանի դիրքորոշման մասին ղարաբաղա-ադրբեջանական շփման գծի մոտ խոցված հայկական ուղղաթիռի վերաբերյալ, քանի որ ՌԴ-ն համարվում է մեր ռազմավարական գործընկերը եւ, ինչպես իշխանություններն են վստահեցնում` մեր ռազմական անվտանգության ապահովողը:
«Մենք ասում ենք Հայաստան, զինակից, ռազմավարական գործընկեր, քաղաքական եւ իրավական իմաստով գործընկերությունը Ռուսաստանի եւ Հայաստանի միջեւ է: Ռուսաստանը կարող է խնդիր լուծել Հայաստանի սահմանների հետ կապված, հենց Հայաստանի նկատմամբ ոտնձգության դեպքում»:
Պարոն Գիմիշյանը գտնում է, որ այս դեպքում Ռուսաստանի գործողությունները պետք է զրո լինեն, եւ ընդհանրապես, Հայաստանը թույլ չպիտի տա որեւէ ուժ տեղակայվի ղարաբաղա-ադրբեջանական գծում:
Ինչ վերաբերում է ՌԴ-ի կողմից Ադրբեջանին զինելուն, պարոն Գիմիշյանը կարծիք հայտնեց, որ քանի փող կա, զենքի վաճառքը միշտ էլ կլինի, իսկ Ադրբեջանը Ռուսաստանից զենք գնելով ավելի մեծ կախվածության մեջ է ընկնում ՌԴ-ից:
Կարդացեք նաև
Մանրամասն` տեսանյութում
«Ժողովրդավարական հայրենիք» կուսակցության նախագահ Պետրոս Մակեյանն էլ նկատեց, որ Հարավային Կովկասում իրավիճակի սրելը հնարավոր է ձեռնտու է եւ ԱՄՆ-ին եւ Ռուսաստանին` 50/50 համամասնությամբ. «Չեմ բացառում, որ հուլիս-օգոստոսից սկսած դեպքերը արտաքին ուժերից է`Ուկրաինայից ուշադրությունը շեղելու համար այստեղ պրոցեսներ տանեն»:
Aravot.am-ը նաեւ հետաքրքրվեց թե ի՞նչ կարծիք ունեն բանախոսները «Ժառանգություն» կուսակցության անդամ Դավիթ Սանասարյանի` ԵԱՀԿ երեւանյան գրասենյակի առջեւ
հացադուլի մասին`ի նշան բողոքի, հայկական ուղղաթիռի խոցման պատճառների բացահայտման, ու մեր 3 սպանված օդաչուների դիերի հետ վերադարձման համար:
Պետրոս Մակեյանը նկատեց, որ որպես պահանջատեր, մեր իշխանությունների պահվածքը համարժեք չէ, արդյունք չկա, ինչ վերաբերում է Դավիթ Սանասարյանի հացադուլին, ապա դա ծայրահեղ քայլ է. «Եթե իշխանությունները ոչինչ չեն ձեռնարկում, կամ ձեռնարկում են ոչ համարժեք, Դավիթը փորձում է իր ծայրահեղ քայլով մեսիջներ տալ դրսին: Բայց Ադրբեջանի վրա ավելի շատ ազդեցություն ունի Ռուսաստանը, քան ԵԱՀԿ-ն: Ես աջակցում եմ Դավիթին, բայց սա զուտ բարոյական քայլ է եւ ազդակ է նաեւ իշխանություններին, որ սառնասրտություն չցուցաբերեն»:
Սոս Գիմիշյանն էլ ասաց, որ հացադուլը, թեեւ արդյունք չի տա, բայց ցանկացած պայքար լուրջ իմաստներ է իր մեջ կրում. «Որեւիցե լավ բան չի լինելու միջազգային հանրության կողմից: Չեմ բացառում, որ այս տարածաշրջանում սրացումն իրենց` միջազգային կառույցների ուզածն է, ապա Դավիթի պայքարին դեմ եմ առողջությունը վտանգելու իմաստով»:
Մանրամասն` տեսանյութում
Նելլի ԲԱԲԱՅԱՆ
