ՀՀ ԱԺ նախագահը եւ Կիպրոսի Հանրապետության ներկայացուցիչների պալատի նախագահ Յանակիս Օմիրուն այս օրերին քննարկել են ԼՂՀ-ի եւ Ադրբեջանի կողմից խփված հայկական ուղղաթիռի հետ կապված հարցեր: Այսօր խորհրդարանում, համատեղ մամուլի ասուլիսում լրագրողները հետաքրքրվեցին`ի՞նչ քայլեր կարող է ձեռնարկել միջազգային հանրությունը, խփված ուղղաթիռի զոհված անձնակազմին ետ բերելու համար:
«Ես դատապարտում եմ յուրաքանչյուր բռնություն եւ տվյալ բռնությունը: Մենք սատարում ենք ՀՀ ԱԺ-ին եւ կառավարությանը`ԼՂՀ հարցը պետք է լուծվի խաղաղ ճանապարհով, ԵԱՀԿ-ի եւ Մինսկի խմբի շրջանակներում»,- ասաց Յանակիս Օմիրուն: Հստակեցնող հարցին` ի՞նչ պետք է անել, երբ Ադրբեջանը թույլ չի տալիս մոտենալ եւ դիակները վերցնել, Կիպրոսի ներկայացուցիչների պալատի նախագահն ասաց. «Նույնիսկ պատերազմի օրենքի շրջանակներում, զոհվածների նկատմամբ հարգանքը պատմության խորքից եկող է: Ադրբեջանի իշխանությունների այդ վերաբերմունքն անթույլատրելի է»:
Հնարավո՞ր է Կիպրոսը ճանաչի ԼՂՀ-ն, հարցին էլ ասաց. «Կիպրոսի Հանրապետությունն առաջնորդվում է միջազգային իրավունքի նորմերով, ՄԱԿ-ի բանաձեւերով: Այդ շրջանակներում, մենք սատարում ենք Հայաստանի դիրքերը, որ խնդիրը կարգավորվի խաղաղ բանակցային ճանապարհով`ԵԱՀԿ Մինսկի խմբի շրջանակներում»: Դիտարկմանը, որ ԼՂՀ-ն դե ֆակտո անկախ է ու ճանաչման խնդիր ունի, նա նույն պատասխանը հնչեցրեց:
Արդեն իր ամփոփիչ խոսքում ԱԺ նախագահ Գալուստ Սահակյանը`դիմելով հայաստանցի լրագրողներին ասաց. «Եթե հյուր է գալիս Հայաստան, առաջին հերթին հյուրի հալից ու քեֆից պիտի հարցնել»: Նա նկատի ուներ այն, որ լրագրողները Կիպրոսի ներկայացուցիչների պալատի նախագահին ՀՀ նախկին վարչապետ Տիգրան Սարգսյանի օֆշորային սկանդալին վերաբերող հարցեր էին տվել:
Կարդացեք նաև
Նելլի ԳՐԻԳՈՐՅԱՆ
