Այսօր՝ նոյեմբերի 20-ին «Հայելի» ակումբում հյուրընկալվել էին բանաստեղծ Ռազմիկ Դավոյանը եւ գեղանկարիչ Հաղթանակ Շահումյանը: Նրանք անդրադարձան սահմանային վերջին դեպքերին եւ հայկական ուղղաթիռի խոցվելուն:
«Ադրբեջանը հատուկ մարտավարություն ունի, հենց հարաբերություների մեղմացման նշույլ է երեւում, իրավիճակը սրելու քայլեր է անում: Այդ քայլերն Ադրբեջանին ոչ մի օգուտ չեն բերում, միջազգային ասպարեզում վարկանիշն էլ ընկնում է, բայց դրանով մեր խնդիրները չեն լուծվում: Իրենց ամբողջ հույսը իրենց նավթադոլարների վրա է…Չնայած այս ամենին, սա չի նշանակում, թե նրանք իրավունք ունեին չեզոք գոտում հայկական ուղղաթիռը խփելու»,-ասում է Ռազմիկ Դավոյանը:
Նրա ձեւակերպմամբ, Ադրբեջանի հետ քաղաքակիրթ լեզվով խոսելը դարձել է աբստրակտ մի բան, իրենք մոռացել են Մինսկի խմբի, հրադադարի եւ այլնի մասին: «Միայն մեր արտաքին գերատեսչության հարցը չէ, մեր նախագահն ուղղաթիռով գնաց Արցախ, դա պատգամ էր Ալիեւին, որ մեր օդային տարածքը պաշտպանված է: Ինչ վերաբերում է ադրբեջանցիներին, նրանց քաղաքականությունը բորենու քաղաքականություն է… Պրովոկատորը սադրանք է արել, որպեսզի մենք էլ հարձակվենք»,-շարունակեց Դավոյանը:
Կարդացեք նաև
Նա չհամաձայնեց լրագրողների այն դիտարկմանը, որ ՀՀ պարտված արտաքին քաղաքականության արդյունքն է, որ չենք կարողանում խոցված ուղղաթիռի անձնակազմի անդամների դիերը բերել: «Ես պատրաստ եմ դրոշն առած գնալ Բաքու, ասել ա՛յ ընկերներ, ա՛յ գարշելի ընկերներ, էս ի՞նչ եք անում, բայց Ալիեւի տերերը նախ պետք է նրան ասեն այ, հեյ, հոյ, էստեղ լեշ չի ընկած, մարդիկ են… Հիմա թե Ալիեւի տերերի շահագրգռությունն ինչքան է, ես չգիտեմ»,- բորբոքվեց արվեստագետը:
Հաղթանակ Շահումյանի ասելով, պետք է պատրաստ լինեինք Ադրբեջանի նման վերաբերմունքին: «Ես ուզում եմ նաեւ ցավակցությունս հայտնել ուղղաթիռի անձնակազմի անդամների ընտանիքներին: Միջազգային հանրությունն էլ մի տեսակ կղերական դիրքորոշում ունի, բոլորին մի գծի վրա են դնում ու խրատում, թե ինչպես պետք է պահեն իրենց: Յոթ-ութ օր է միջազգային կազմակերպություններին թույլ չեն տալիս մոտենալ ուղղաթիռին: Երեւի մերոնք գիտակցաբար ուժային մեթոդներով չեն գնում դիակները բերելու, եթե չեզոք տարածք է՝ Ադրբեջանը կարող է իր հսկողության տակ վերցնել, մենք էլ կարող ենք հսկել, հետախույզներով, բանով դիակները բերել: Մեր տեղեկությունները լրատվամիջոցներից է եւ ֆեյսբուքից, ավելիին չենք տիրապետում: Երեւի մերոնք գիտակցաբար թողնում են ուղղաթիռը, որ միջազգային կառույցները գնան տեսնեն, որ դա իրոք խոցված ուղղաթիռ է»,-ասում է գեղանկարիչը:
Արվեստագետները պատրաստ են տարբեր ազգերի ողջամիտ մտավորականերով հավաքվել ու համապատասխան հայտարարությամբ հանդես գալ:
Գոհար ՀԱԿՈԲՅԱՆ
