Ինչպես տեղեկացրել ենք, այս տարվա սեպտեմբերի 11-ին Գյումրիում փորձարկվեց «Մերսեդես» մակնիշի առաջին փոշեկուլ մեքենան, որը Գյումրու քաղաքապետարանը գնել էր Գերմանիայից և արժեքը մոտ 12 միլիոն դրամ է: Փոշեկուլ մեքենան երկար ժամանակ վարորդ չուներ: Ինչպես պատճառաբանում էր քաղաքապետարանի բնակկոմունալ բաժնի պետ Կնյազ Մանասյանը, մեքենայի մեջ համակարգիչներ են, կոճակները շատ են, և գլուխ պետք է հանել, թե յուրաքանչյուրն ինչ գործողություն է կատարում:
Այսօր Aravot.am-ը Կնյազ Մանասյանից հետաքրքրվեց, թե ճարվե՞ց վարորդ թանկարժեք մեքենայի համար և հաջողվո՞ւմ է աշխատեցնել այն Գյումրու ցեխոտ փողոցներում: Քաղաքապետարանի պաշտոնյան տեղեկացրեց, որ փոշեկուլն արդեն վարորդ ունի: «Նա Մոսկվայից է եկել, 35-ամյա գյումրեցի տղամարդ է:Նմանատիպ մեքենա է վարել ՌԴ-ում, փորձ ունի: Նա եկավ ու միանգամից գլուխ հանեց այս մեքենայից»,- ասաց քաղաքապետարանի պաշտոնյան:
Կնյազ Մանասյանը նաև տեղեկացրեց, որ փոշեկուլ մեքենան այս պահին նպատակահարմար չէ օգտագործել, քանի որ անձրևային եղանակներ են ու եթե մեքենան ցեխերը հավաքի, դրանից հետո թանկարժեք այս տեխնիկան վերականգնելը դժվար կլինի: «Մեքենան աշխատեցնում ենք այնտեղ, որտեղ ցեխեր չկան: Մինչև գարուն երևի թե չաշխատեցնենք, ո՞ւմ ենք զարմացնում»,- ասաց քաղաքապետարանի պաշտոնյան:
Նշենք, որ փոշեկուլ մեքենայի վարորդի աշխատավարձը ամսական 150 հազար դրամ է:
Կարդացեք նաև
Նունե ԱՐԵՎՇԱՏՅԱՆ
սխալ: ամսԵկան
ճիշտ: ամսԱկան
Հայերէնի վերջածանցը -ական է: Եթէ բառը Ի տառով է վերջանում, ապա հնչիւնափոխւում է:
Այսպիսով՝ օրԱկան, ամսԱկան, բայց՝ տարԵկան:
Նոյն կերպ՝ այգԵգործ, բարԵգործ:
Շատ շնորհակալ ենք Ձեր դիտողությունների համար: Ուղղումն արված է: Երբ մեր լրագրողի խոսքում է լինում՝ անմիջապես ենք ուղղում, ու թողնում ենք անփոփոխ, եթե ուրիշի խոսքից ուղղակի մեջբերում է:
Ե՛ս եմ շնորհակալ եմ, տիկին Իսրայէլեան: Լեզուին վերաբերող իմ մեկնաբանութիւնները կարող էք չհրապարակել: Պարզապէս ուղղումն արէք ու ջնջէք: Ինձ միայն ուղղումն է հետաքրքրում: Գուցէ մի որոշ ժամանակ հետեւեմ լրահոսին, մօտս գրի առնեմ յաճախ հանդիպող լեզուական վրիպակները ու էլ-նամակով ուղարկեմ ԱՌԱՒՕՏԻ խմբագրութիւն:
Իսկապէս, ուրիշի ուղղակի խօսքը խնդրայարոյց է, յատկապէս, երբ ձայնը լսւում է ու խմբագրել հնարաւոր չէ: Մեր պաշտօնեաների հայերէն խօսքը մեղմ ասած զարհուրելի է (Մանուէլ, Սեյրան, Շմայս, Լֆիկ, Թոխմախ): Սակայն պիտի միասին որեւէ լուծում գտնենք, որ անհարկի օտար բառերը մամուլ չսպրդուեն: Հաւատացէք, երբ դրանց քանակը ընթերցողի աչքին պակասում է, բանաւոր խօսքն էլ է դրանից բարելաււում:
Յ.Գ. Մի քանի օր առաջ գրել էի Յետադարձ կապի մասին: Հնարաւոր չէ՞ մեր թողած էլ-փոստի միջոցով տեղեկացնել՝ արդեօ՞ք գրածին «պատասխանող» եղել է: Շնորհակալութիւն:
Չէ, արժե հրապարակել մեկնաբանությունները: Գուցե ուրիշների համար էլ ուսանելի լինեն:
Որքան հնարավոր է՝ աշխատում ենք խուսափել օտարաբանություններից: Սակայն վրիպումները, բացթողումներն անխուսափելի են՝ լրահոսի այսպիսի ծավալի դեպքում:
Ինչ վերաբերում է հետադարձ կապի խնդրին՝ կփորձենք կայքում անել համապատասխան փոփոխություններ: Կրկին շնորհակալ եմ Ձեր դիտողությունների համար: