Այսօր եռյակի նիստի ավարտից հետո, լրագրողների հետ զրույցում ՀԱԿ խմբակցության ղեկավար Լեւոն Զուրաբյանն`ի պատասխան հարցերի, ասաց, որ նորմալ է վերաբերվում նրան, որ համաժողովրդական շարժումը համալրել են Տիգրան Կարապետյանի եւ Արամ Հարությունյանի ղեկավարած կուսակցությունները:
Լրագրողները, մասնավորաբար, հիշեցնում էին Արամ Հարությունյանի հնչեցրած բացասական գնահատականները ՀԱԿ-ի եւ Լեւոն Տեր-Պետրոսյանի հասցեին: Զուրաբյանը հիշեցրեց, որ Տիգրան Կարապետյանը դեռ 2011-ին էլ էր միացել իրենց շարժմանը, ապա ասաց, որ այս պահին կան առավել կարեւոր մտահոգություններ, քան իրենց հասցեին նախկինում հնչած քննադատությունն է: Նաեւ հավելեց, որ եռյակի ձևաչափը հստակեցված է, մնացյալ բոլոր ուժերը համագործակցելու են`առանց համալրելու եռյակը:
Aravot.am-ն էլ հիշեցրեց, որ ՀԱԿ-ն այդպես էլ չմեկնաբանեց ԲՀԿ առաջնորդ Գագիկ Ծառուկյանի եւ ՕԵԿ առաջնորդ Արթուր Բաղդասարյանի հանդիպումը, մինչդեռ Լեւոն Տեր-Պետրոսյանը դեռ հոկտեմբերի 10-ի հանրահավաքում էր հայտարարել, որ ՕԵԿ-ն ու Ռոբերտ Քոչարյանը համաժողովրդական շարժման հետ կապ չունեն:
«Թույլ տվեք օգտվել իմ իրավունքից եւ շարունակել չմեկնաբանել այդ հանդիպումը»,- ասաց Լեւոն Զուրաբյանը: Խնդրանքին`գոնե հիմնավորում ներկայացնել`թե ի՞նչ պատճառով չեն մեկնաբանում, Լեւոն Զուրաբյանը պատասխանեց. «Թույլ տվեք օգտվել իմ իրավունքից եւ չհիմնավորել, թե ինչո՞ւ չենք մեկնաբանում»:
Կարդացեք նաև
Նելլի ԳՐԻԳՈՐՅԱՆ
