«Արցախի Հանրապետությունը պետք է քայլեր ձեռնարկի պարզելու համար ղարաբաղա-ադրբեջանական շփման գծում ադրբեջանական զինուժի կողմից խոցված հայկական ուղղաթիռի անձնակազմի ճակատագիրը»,- այսօր խորհրդարանում լրագրողների հետ զրույցում հայտարարեց ՀՀ ԱԺ փոխնախագահ Էդուարդ Շարմազանովը`հավելելով. «Թե ինչպիսի՞ն կլինեն արցախյան կողմի քայլերը, բացառապես կախված է Ադրբեջանի ղեկավարության կեցվածքից և իրականությունը սթափ գնահատելու Ադրբեջանի կարողությունից»:
Ըստ ԱԺ փոխխոսնակի, Ադրբեջանն անմարդկային կեցվածք է ցուցաբերում` թույլ չտալով մոտենալ խոցված ուղղաթիռին և պարզել անձնակազմի ճակատագիրը: Այսպիսով եւս, նրա գնահատմամբ, Ադրբեջանը շարունակում է սադրանքներն, ինչը միջազգային հումանիտար իրավունքի, մասնավորապես Ժնևյան կոնվենցիայի ակնհայտ խախտում է:
«Մեկ անգամ ասել եմ, ևս մեկ անգամ պատրաստ եմ կրկնել, որ իրավիճակի հնարավոր սրման ամբողջական պատասխանատվությունն ընկնելու է բռնապետական Ադրբեջանի վրա»,-ասաց Էդուարդ Շարմազանովը:
Նա կարծում է, որ միջազգային հանրությունը պետք է ավելի շատ ճնշում գործադրի Ադրբեջանի վրա, որովհետև այդ երկիրը կոպտորեն խախտում է Ժնևյան կոնվենցիան:
Կարդացեք նաև
Նելլի ԳՐԻԳՈՐՅԱՆ
