«Ազգային ժողովի հարգելի նախագահ,
հարգելի պատգամավորներ,
Ինձ համար մեծ պատիվ է Հայաստանի Հանրապետության ԱԺ նախագահ պարոն Գալուստ Սահակյանի ջերմ հրավերով պաշտոնական այցով գտնվել բարեկամ Հայաստանում եւ ելույթ ունենալ Հայաստանի Հանրապետության Ազգային ժողովում, ինչի համար իմ խորին շնորհակալությունն եմ հայտնում Ձեզ: Վստահ եմ, որ այս այցի
շրջանակներում քաղաքական ղեկավարության հետ նախատեսված հանդիպումներն իրենց ուրույն դերակատարությունը կունենան առկա գերազանց հարաբերությունների էլ
ավելի ամրապնդման գործում:
Այսօր իմ ներկայությունն այստեղ կիպրացի եւ հայ ժողովուրդների միջեւ
երկարամյա բարեկամության ակնհայտ ապացույցն է եւ վերստին այն հաստատում է: Այս
բարեկամության հիմքն է հանդիսանում անկեղծ համերաշխությունը, որը երկուստեք
բազմիցս ցուցաբերվել է դժվար իրավիճակներում: Կիպրոսում հայկական սփյուռքի
ներկայությունը լրացուցիչ երաշխիք է մեր կապերը շարունակելու եւ ավելի
ամրապնդելու համար՝ ստեղծելով քաղաքական, տնտեսական, ռազմական, կրթական եւ
մշակութային ոլորտներում համագործակցության լայն եւ բազմակողմ շրջանակ:
Այստեղ, այսօր, Կիպրոսի Ներկայացուցիչների պալատում Հայկական կրոնական խմբի
արժանապատիվ ներկայացուցիչ պարոն Մահտեսյանի ներկայությունը հաստատում է
Հայաստանի հետ անքակտելի կապերի պահպանման մեր հանձնառությունը:
Մեր երկու երկրների փոխադարձ աջակցությունը հիմնված է ամուր հիմքերի վրա, որը
կոփվել է համատեղ պայքարներով մեր ժողովուրդներին մինչ օրս տառապանքի ենթարկող
ընդհանուր թշնամու դեմ, ինչպես նաեւ ընդհանուր արժեքների եւ սկզբունքների
հիման վրա, որոնց մենք հավատարիմ ենք:
Կարդացեք նաև
Այս բարձր ամբիոնից Ներկայացուցիչների պալատի անդամների եւ Կիպրոսի ժողովրդի
անունից ցանկանում եմ մեր երախտագիտությունը հայտնել Հայաստանի վարած
սկզբունքային եւ կայուն քաղաքականության համար՝ հանուն մեր երկրի եւ ժողովրդի
ազատության ու վերամիավորման: Մեզ հայտնի է այն գինը, որ դուք վճարում եք ձեր
աջակցության համար, ինչի համար էլ եւ երախտապարտ ենք ձեզ:
Ինչպես տեղյակ եք, արդեն քառասուն տարի է, ինչ Թուրքիան օկուպացված է պահում
Կիպրոսի Հանրապետության տարածքի մեծ մասը՝ խախտելով միջազգային իրավունքի
նորմերը եւ սկզբունքները: Կիպրական կողմը հավատարիմ է հասնելու խնդրի արդար
լուծմանը՝ եվրոպական իրավունքի, 1977 եւ 1979 թվականների բարձր ատյաններում
ձեռք բերված պայմանավորվածությունների եւ ՄԱԿ-ի համապատասխան բանաձեւերի
համաձայն: Սակայն մեր բոլոր ջանքերը բախվում են թուրքական
անհանդուրժողականությանը եւ ամբարտավանությանը: Թուրքիան առաջադրում է
պայմաններ, որոնք, անկասկած, տանում են այնպիսի լուծման, որի հիմքում ընկած է
«երկու պետության» սկզբունքը:
Թուրքիան, հավատարիմ լինելով նոր օսմանյան գործելաոճին, փորձում է յուրացնել
Կիպրոսի Բացարձակ տնտեսական գոտում առկա հարուստ բնական պաշարները եւ որդեգրել է Կիպրոսի Բացարձակ տնտեսական գոտում ինքնիշխան իրավունքների ոտնահարման քաղաքականությունը: Իրավունքների, որոնք հիմնված են ավանդական իրավունքի վրա եւ երաշխավորված են 1982 թվականի Ծովային իրավունքի ՄԱԿ-ի կոնվենցիայով:
Սակայն Թուրքիայի դրսեւորումները հարիր չեն միջազգային իրավունքը հարգող եւ
Եվրամիության անդամ դառնալ ցանկացող պետությանը: Այս պահին թուրքական
հետազոտող «Բարբարոս» նավը, ռազմական եւ օժանդակող նավերի ուղեկցությամբ,
անօրինական կերպով գտնվում է Կիպրոսի Բացարձակ տնտեսական գոտում եւ որի
նպատակն է, ինչպես ներկայացնում է Թուրքիան, սեյսմիկ տվյալների հավաքագրումը:
Միեւնույն ժամանակ աշխատանքներ են իրականացվում կազմակերպությունների կողմից,
որոնց Կիպրոսի Հանրապետությունը թույլատրել է ուսումնասիրել բնական գազի
պաշարների առկայությունը: Թուրքիան չի տատանվում եւ հայտարարում է, որ մոտակա
ժամանակ նաեւ արդյունահանման հարթակ է տեղադրելու Կիպրոսի Բացարձակ տնտեսական
գոտում:
Չնայած այն հանգամանքին, որ Թուրքիայի քայլերը միջազգայնորեն դատապարտվում
են, եւ որպես վառ ապացույց՝ վերջերս՝ նոյեմբերի 13-ին, Եվրոպական խորհրդարանը
հստակ բանաձեւ ընդունեց, Թուրքիայի կողմից իրականացվող խախտումները թեժանում
են, եւ ապակայունացվում է ամբողջ տարածաշրջանը: Միեւնույն ժամանակ Թուրքիայի
պետական եւ ռազմական գործիչներն անկաշկանդ եւ ուղղակիորեն սպառնում են
ռազմական ուժ կիրառել, եթե Կիպրոսի Հանրապետությունը շարունակի կիրառել իր
ինքնիշխան իրավունքները:
Նման պայմաններում Կիպրոսի Հանրապետությունը ստիպված էր կասեցնելու Կիպրոսի
հիմնախնդրի շուրջ բանակցություններում իր մասնակցությունը եւ հայտարարելու
Թուրքիայի դեմ քաղաքական եւ իրավական քայլերի ձեռնարկման մասին: Վստահ եմ՝
կհամաձայնեք, որ վախի եւ բացահայտ սպառնալիքի մթնոլորտում անտրամաբանական է
շարունակել բանակցությունները:
Թուրքիայի այս դրսեւորումները Ձեզ հայտնի են: Համագործակցության
արձանագրությունների ստորագրման կասեցումը, հայտնի պատճառներով, որոնք վերջին
պահին ներկայացրել է Անկարան, նույն քաղաքականության արտահայտությունն են:
Չնայած Անկարայի առաջացրած բարդություններին՝ Կիպրոսը եւ Հայաստանը պետք է
ակտիվացնեն երկկողմ հարաբերությունները, միավորեն միջազգային
կազմակերպություններում իրենց ուժերը եւ օգտագործեն կիպրական եւ հայկական
սփյուռքի լծակները որոշումներ կայացնող ատյաններում՝ ընդհանուր ճակատ
ձեւավորելով ընդդեմ Թուրքիայի քաղաքականության: Ներկայացուցիչների պալատի
անդամների եւ իմ անունից այդ ուղղությամբ գործելու լիակատար
պատրաստակամություն եմ հայտնում:
Ազգային ժողովի հարգելի նախագահ,
Եւս մեկ անգամ շնորհակալություն եմ հայտնում Ձեզ հրավերի, ջերմ
ընդունելության եւ հյուրընկալության համար, որոնց մենք արժանացանք: Ցանկանում
եմ, որ Դուք նույն զգացումներն ապրեք հնարավորինս մոտ ժամանակում Կիպրոս
կատարելիք Ձեր այցի ընթացքում:
Հայաստանի Հանրապետությանը եւ հայ ժողովրդին մաղթում եմ առաջընթաց,
բարօրություն եւ ակնկալիքների արագ իրականացում: Հնարավոր է, որ Հայաստանը եւ
Կիպրոսը հզոր պետություններ չեն, բայց մեր հաստատակամությունն արդարացված է:
Ուժը չի կարող խոնարհել մեր ժողովուրդներին: Մենք ավելի դժվար պայմաններում
ենք գոյատեւել եւ բարգավաճել: Պայքարելով հանուն ազատության եւ արդարության՝
հայ եւ կիպրացի ժողովուրդները հաստատուն կամք ունեն, եւ այդ կամքն անսասան է:
Շնորհակալություն»:
ՀՀ ԱԺ հասարակայնության և տեղեկատվության միջոցների հետ կապերի վարչություն
