Այսօրվա մամուլի ասուլիսը սկսելուց առաջ ՀՖՖ նախագահ Ռուբեն Հայրապետյանը հայտարարեց, որ հատկապես Պորտուգալիայի հետ խաղից հետո տարբեր լրատվամիջոցներ փորձել են իրենից հեռախոսով որոշ հարցերի մեկնաբանում ստանալ: «Ես բազմիցս եմ ասել, որ հեռախոսով հարցազրույց չեմ տալիս: Դրա համար այսօր հրավիրել եմ այս ասուլիսը, որպեսզի պատասխանեմ ձեզ հետաքրքրող բոլոր հարցերին»:
Պարոն Հայրապետյանը քիչ ավելի ուշ զարմացավ, որ դեմ առ դեմ նստած` հարցերը շատ քիչ են` ասելով. «Միայն երեկ իմ հեռախոսին ավելի շատ զանգ է հնչել, քան այսօր այստեղ եք ինձ հարցեր ուղղում: Բոլորին թվում է, թե ես պետք է սենսացիոն հայտարարություն անեմ: Տվեք ձեզ հետաքրքրող հարցերը: Ես պատրաստ եմ բոլորին էլ պատասխանել»:
Ի պատասխան առաջին հարցի, թե ինչպե՞ս է գնահատում հավաքականի գլխավոր մարզիչ Բեռնար Շալանդի աշխատանքը, ՀՖՖ նախագահն ասաց. «Որպես ֆեդերացիայի նախագահ, բնականաբար, ինձ ավելի շատ արդյունքներն են հետաքրքրում: Արդյունքներից շատ դժգոհ եմ: Ինձ չի կարող բավարարել այն իրավիճակը, որ հավաքականը երեք խաղում ընդամենը մեկ միավոր է վաստակել: Շալանդին վստահո՞ւմ եմ, թե ո՞չ: Եթե չվստահեի, հիմա կհայտարարեի, որ նա հեռացված է աշխատանքից: Բայց դա չեմ անում, որովհետեւ առայժմ վստահում եմ: Բավարարո՞ւմ է ինձ նրա խաղային տակտիկան: Իհարկե`ոչ»:
Aravot.am-ը Ռուբեն Հայրապետյանին խնդրեց մանրամասնել, թե մի կողմից մինչեւ այս պահը հավաքականի ցույց տված արդյունքից դժգոհ է, Շալանդի խաղային տակտիկան էլ չի գոհացնում, բայց ֆեդերացիայի նախագահը շարունակում է վստահել նրան: Իրենք գուցե զրուցե՞լ են: Պատասխանը հետեւյալն էր. «Ես չեմ միջամտում հավաքականի գործերին: Բայց, իհարկե, իմ կարծիքը ցանկացած ժամանակ ասում եմ: Օրինակ, Արտակ Դաշյանի հետ կապված: Ես նրան խորհուրդ եմ տվել Արտակ Դաշյանին ազգային հավաքական չհրավիրել, որովհետեւ նա խաղամակարդակով, տակտիկական ունակություններով չի համապատասխանում ազգային հավաքականի պահանջներին: Շալանդի հետ ի՞նչ պետք է զրուցեի կամ քննարկեի: Նրան տակտիկա՞ պետք է սովորեցնեմ: Երբեք` ոչ: Ես հաստատ դրանք իրենից լավ չգիտեմ», – պատասխանեց Ռուբեն Հայրապետյանը:
Կարդացեք նաև
Աշոտ ՀԱԿՈԲՅԱՆ
