«Ռուսաստանը մեր կարևոր տնտեսական գործընկերն է, չնայած այն հանգամանքին, որ մենք բացասական հաշվեկշիռ ունենք Ռուսաստանի հետ տնտեսական հարաբերություններում` ավելի շատ ենք ներմուծում, քան արտահանում: ԵՏՄ-ին անդամակցելով մենք չենք կորցնում ռուսական շուկան, քանի որ մեր ապրանքները մրցունակ են այդ շուկայում»,- այսօր «Բլից ինֆո» ակումբում անդրադառնալով Հայաստանի Եվրասիական տնտեսական միությանը անդամակցության դրական և բացասական հետևանքներին` ասաց սոցիոլոգ Ահարոն Ադիբեկյանը:
Նա խոսքով, ԵՏՄ-ին անդամակցելը Հայաստանի արտահանման ցուցանիշի աճ կապահովի, որովհետեւ Ռուսաստանի նկատմամբ կիրառվող տնտեսական պատժամիջոցները նպաստում են գյուղմթերքի պահանջարկի աճին: Այդ պահանջարկն էլ կարող է ապահովել հայկական գյուղարտադրանքը»:
Ահարոն Ադիբեկյանը ասաց, որ Հայաստանից Ռուսաստան ապրանքների արտահանումը մեր երկրի ներսում կառաջացնի ապրանքների պակասորդ, ինչն էլ իր հետ բերելու է գնաճ:Նա նկատեց, որ արդեն առաջին անհրաժեշտության մի շարք ապրանքներ թանկացել են` ձուն, միրգը, բանջարեղենը.
«Մենք, մտնելով ԵՏՄ, դառնում ենք միասնական տնտեսական տարածք և դուք չեք կարող արգելել ռուսական ընկերություններին տնտեսական գործունեություն ծավալել Հայաստանում»:
ԵՏՄ-ին անդամակցելու բացասական հետեւանքներից սոցիոլոգը առանձնացրեց արտագաղթի տեմպերի աճը.
Կարդացեք նաև
«ԵՏՄ-ին անդամակցությունը կարագացնի նաև արտագաղթը, սակայն արտագաղթը լինելու է ոչ այնքան քանակական, ինչքան որակական` արտագաղթելու է միջին դասը»:
Վերջում էլ ասաց, որ Ռուսաստանի շահերից է բխում ներգաղթի կազմակերպումը Հայաստանից, Վրաստանից, Ուկրաինայից:
Արփինե ՍԻՄՈՆՅԱՆ
