Հայաստանի պետական ճարտարագիտական համալսարանում այսօր մեկնարկեց համալսարանի 18-րդ տարեկան գիտաժողովը:
Գիտաժողովի ընթացքում այս տարի ներկայացվելու են 369 հեղինակների 195 զեկուցումներ: Բացի Ճարտարագիտական համալսարանի ներկայացուցիչներից, գիտաժողովին զեկույցներով նաեւ հանդես են գալու 66 այլ կազմակերպությունների ներկայացուցիչներ: Զեկուցումներով հանդես են գալու 38 գիտությունների դոկտորներ, 132 գիտության թեկնածուներ, 68 ուսանողներ: Զեկույցները լինելու են ֆիզիկամաթեմատիկական գիտությունների, մեխանիկայի, մեքենաշինության, էլեկտրատեխնիկայի, էներգետիկայի, տեղեկատվական տեխնոլոգիաների, մետալուրգիայի եւ այլ ոլորտներից:
Հայաստանի պետական ճարտարագիտական համալսարանի ռեկտորի պաշտոնակատար Հովհաննես Թոքմաջյանը իր բացման խոսքում նշեց, որ գիտաժողովը մեծ իրադարձություն է համալսարանի համար. «Ես կարծում եմ, որ սա նշանակալի իրադարձություն է պոլիտեխնիկի կյանքում, որովհետեւ տասնամյակներ շարունակ պոլիտեխնիկական համալսարանի պրոֆեսորները, դոցենտները, ինժեներները միշտ կարողացել են այնպիսի գործունեություն ծավալել գիտության ասպարեզում, որ նրանց աշխատանքները նշանակալի ներդրում են ունեցել ինչպես Հայաստանում, այնպես էլ արտերկրում»:
Գիտությունների Ազգային Ակադեմիայի նախագահ Ռադիկ Մարտիրոսյանն էլ գիտաժողովին իր ելույթի ժամանակ նշեց, որ տնտեսության զարգացման հիմքը գիտությունն է. «Պետք է ունենալ տնտեսություն, որը արագ գիտական ձեռքբերումների հիմք ունի, ավելի ճկուն է եւ ավելի արագ կարող է փոփոխվել: Այսպիսին է այսօրվա հրամայականը»: Պրն Մարտիրոսյանի խոսքով՝ Հայաստանի տնտեսությունը այն աստիճանի զարգացած չէ, որ ինովացիաների կարիք ունենա. «Մեր շուկան այնպիսին չէ, որպեսզի տնտեսվարող սուբյեկտը միջոցներ ծախսի, եւ տեխնիկական միջոցը հասցնի շուկա: Դա ռիսկային է եւ մեր շուկան շատ փոքր է դրա համար:Այդ պատճառով պետք է նաեւ դեպի արտաքին շուկան էլ ուղղված լինենք»:
Կարդացեք նաև
ՀՀ ԿԳՆ գիտության պետական կոմիտեի նախագահ Սամվել Հարությունյանն էլ իր խոսքում կարեւոր համարեց այն, որ գիտաժողովին մասնակիցների թիվը բավականին շատ է այս տարի եւ առանձնացրեց այն, որ զեկուցողների շարքում նաեւ շատ է ուսանողների թիվը. «Այս հիմնարկում ապագա սերունդների դաստիարակման համար լուրջ նախադրյալներ կան»:
Նշենք, որ գիտաժողովը նպատակ ունի հարթակ դառնալ համալսարանի պրոֆեսորադասախոսական անձնակազմի, ասպիրանտների, մագիստրանտների, ինչպես նաև ուսանողների համար գիտական զեկուցման ձևով ներկայացնելու իրենց կողմից կատարված գիտական մշակումները, նախագծերը, կազմակերպել համապատասխան քննարկումներ:
Էլյա ՀՈՎՀԱՆՆԻՍՅԱՆ
