Այսօր ՀՀ վարչական դատարանում հետաձգվեց «Հասարակական դաշինք» նախաձեռնության անդամ Վարդան Զեյնալյանի դեմ դատական գործի քննությունը: ՀՀ ոստիկանությունը պահանջում է Վարդան Զեյնալյանին պատասխանատվության ենթարկել ՀՀ ՎԻՎ օր 182-րդ հոդվածով սահմանված` ՀՀ ոստիկանի իրավական պահանջը չկատարելու համար: Ոստիկանության պահանջի բավարարման դեպքում Վարդան Զեյնալյանը կենթարկվի 50.000 ՀՀ դրամի չափով վարչական պատասխանատվության:
Հունիսի 23-ին էլեկտրաէներգիայի սակագնի բարձրացման դեմ տեղի ունեցած բողոքի ակցիայի ժամանակ ոստիկանական բաժին տարված և վարչական դատարանի առջև որպես պատասխանող կանգնած ակտիվիստ Վարդան Զեյնալյանն այսօր հակընդդեմ հայց ներկայացրեց դատարան՝ պնդելով, որ հենց ոստիկաններն են ոչ օրինական գործողություններ իրականացրել ակտիվիստների նկատմամբ:
Դատարանը դատական նիստը հետաձգեց` հակընդդեմ հայցին ծանոթանալու համար: Հաջորդ դատական նիստի մասին կողմերը պատշաճ կերպով կծանուցվեն:
Տաթև ՀԱՐՈՒԹՅՈՒՆՅԱՆ
