«Մենք պետք է արձանագրենք իրողությունը, որ ցանկացած պետություն պետք է մասնակցի ինտեգրման գործընթացին»,- այսօր՝ նոյեմբերի 17-ին, «Հայացք» մամլո ակումբում լրագրողների հետ հանդիպման ընթացքում, անդրադառնալով Սահմանադրական դատարանի` Հայաստանի` Եվրասիական տնտեսական միությանը անդամակցելու համաձայնագրի սահմանադրականության համապատասխանության որոշմանը, հայտարարեց ԵՊՀ Սահմանադրական իրավունքի ամբիոնի դոցենտ Վարդան Այվազյանը:
Նա նշեց, որ հայ հասարակությունը քաղաքացիական գիտակցության բարձր մակարդակի չի հասել, որպեսզի հանրաքվեով լուծվեր այդ խնդիրը. «Գործառույթները սահմանադրորեն վերապահված են նախագահին եւ Ազգային ժողովին, որոնք իրականացնում են դրանք` ժողովրդի անունից: Եթե Ազգային ժողովը` որպես ժողովրդի ներկայացուցիչ, համաձայն չէ այդ պայմանագրի հետ, կարող է չվավերացնել եւ այդ համաձայնագիրը իրավական ուժ չի կարող ստանալ»:
Վարդան Այվազյանը համարում է, որ Սահմանադրական դատարանը պատշաճ իրավական հիմնավորում է տվել, եւ այդ որոշմամբ չի խախտում գործող Սահմանադրությունը. «Սա հերթական վերազգային կառույցն է: Բացարձակապես Սահմանադրության որեւէ դրույթի խախտում չկա այս գործընթացում»:
Ամի ՉԻՉԱԿՅԱՆ
