«Միշտ ճնշումներն են ստիպում պահանջները կատարել, քաղաքական պրոցեսն այդ տրամաբանությամբ զարգանալով է հասել այստեղ: Նույն քառյակն էլ, ըստ էության, ձևավորվեց հենց այդ պատճառով, որովհետև իշխանությունները կոշտ պահվածք էին որդեգրել, ինչը ստիպեց մոբիլիզացնել մյուս կողմին: Ոչ իշխանական քաղաքական ուժերը եթե նույն տրամաբանությամբ շարունակվեն, ես կարծում եմ, այդ պատրանքները կցրվեն»- այսօր խորհրդարանում, լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանն` անդրադառնալով ոչ իշխանական ուժերի առաջարկած 12 պահանջների կատարումը վերանայելու Սերժ Սարգսյանի հայտարարությանը և եռյակի արձագանքին: Հիշեցնենք, եռյակն առաջարկում է, որ իշխանությունը կոնկրետ գնա Ընտրական օրենսգրքի բարեփոխումների:
Լրագրողներից մեկի հարցին`ՀՅԴ-ի պահվածքը փաստո՞ւմ է այն մասին, որ Դաշնակցությունն իշխանությունների վրա ճնշում գործադրելու հարցում մասնակցություն չունի, Արմեն Ռուստամյանը հարցով պատասխանեց. «Ինչ-որ քաղաքական օրակարգ այսօր ձևավորվե՞լ է, որտեղ Դաշնակցությունը չկա: Մենք քաղաքական օրակարգերի և հետևողական քայլերի ձևավորմանն ունեցել ենք ամենաանմիջական մասնակցությունը: Մենք իմիտացիաների կողմնակից երբեք չենք եղել: Նույն եռյակին հաջողություն ենք մաղթել, որ երկու բանից զերծ պահեն մեր ժողովրդին՝ արյունահեղությունից և հիասթափությունից: Էդ արանքում մենք կանենք ամեն ինչ իրար հետ, դա էլ անում է Դաշնակցությունը: Մեր քայլերն ուղղած են կայուն ու լուրջ զարգացում ապահովելուն»:
Հարցին`ժողովրդին հիասթափեցնելու քայլեր տեսանելի՞ են՝ հաշվի առնելով այն, որ եռյակը չի հայտարարում, թե երբ են լինելու հաջորդ հանրահավաքները, ավելին, անորոշությունները շատ են, Արմեն Ռուստամյանն ասաց. «Հոկտեմբերի 10-ի հանրահավաքից հետո անորոշությունները շատ էին: Ես չեմ կարծում, որ 24-ի հանրահավաքն այդ անորոշությունները ցրեց: Մի բան փաստ է և լավ է, որ արյունահեղություն չի եղել: Հիասթափությունն ինչքանո՞վ է, դա թող հասարակությունն ինքը որոշի: Բոլոր այն հարցերը, որոնք այսօր հասարակությանը հուզում են, ես չեմ տեսնում, որ ամսի 24-ից հետո բավարարված են: Բայց ես չեմ համարում, որ սա ձախողում է կամ փակուղի մտած վիճակ, քաղաքական գործընթացն այդպիսին է, ամեն ինչ միանգամից տեղի չի ունենում: Հասարակությունը պետք է սովորի երկարատև պայքարի, բայց նաև պետք է հասկանա՝ այդ պայքարի քայլերն իրական են, ուր են տանում, այս խնդիրները, որոնք դրված են, դրանց համապատասխան լուծումներ առաջարկվում են, թե՞ ոչ»:
ՀՅԴ խմբակցության ղեկավարն ասաց, որ վերոնշյալի պատճառն է, որ ՀՅԴ-ն ամբողջական իշխանափոխության կողմնակից է, ոչ թե անձերի փոփոխության, որը մեր երկրում որեւէ արդյունքի չի բերելու: Դիտարկմանը, որ եռյակն էլ է խոսում իշխանափոխությունից, նա պատասխանեց. «Եռյակի ինչ-որ մի մասն անհապաղ իշխանափոխության մասին է խոսում: Քառյակում գոյություն ուներ երկու մոտեցում՝ ամբողջական իշխանափոխության գաղափարախոսությունը, որը մենք ենք ի սկզբանե ասել ենք, և այդ ժամանակ ինչ ծաղր ու ծանակ ասես կատարեցին, թե՝ Դաշնակցությունը դա արել է՝ խուսափելու համար իշխանափոխությունից: Կարդացեք թերթերը, որոնք եռյակն են սպասարկում, կտեսնեք, որ տիեզերական իշխանափոխությունից են խոսում, մենակ թե իշխանափոխություն չլինի: Ոչ, մենք ուզում ենք այն իշխանափոխությունը, որն ամբողջական իմաստ ունի: Անհապաղ իշխանափոխություն, սա էլ մյուս տեսակետն էր, որ քառյակում գոյություն ուներ, և այդ անհապաղը տեղի չի ունենում: Այ սա, այո, բերելու հիասթափության: Ասում ենք՝ մի գնացեք այդ ճանապարհով, եկեք իսկապես հիմքեր ստեղծենք, որ եթե մի բան իսկապես փոխվում է, ծառայի ժողովրդին, ոչ թե նրանց, ովքեր գալիս են իշխանության»:
Կարդացեք նաև
Մարզերում շտաբների ձևավորման գործընթացը Արմեն Ռուստամյանը նորմալ է համարում, քանզի շարժումը պետք է կազմակերպվի: Բայց լուրջ հարց է համարում այն, թե այդ շտաբներն ինչպե՞ս կաշխատեն, կկարողանա՞ն լուրջ ցանց դառնալ:
Հարցին, թե ՀՅԴ-ն պլանավորո՞ւմ է նորից միանալ եռյակին, Ռուստամյանը պատասխանեց, որ Դաշնակցությունը միանում է բոլոր այն նախաձեռնություններին, որոնք բխում են իրենց հրապարակած յոթ կետերից. «Որևէ ուժ կասի՝ այս յոթ կետից այս կետը եկեք իրար հետ իրականացնենք, խնդրեմ, հարց չկա, կլինի քառյակ, եռյակ, հնգյակ, թե տասնյակ»:
Արմեն Ռուստամյանը նաև դժգոհեց, որ ՀՅԴ-ի քայլերը մշտապես քննադատության են արժանանում, բայց արդյունքում քննադատողներն օգտվում են ՀՅԴ-ի պայքարի պտուղներից, ինչպես հիմա են օգտվում. «Մենք Ազգային ժողովում ավելացրել ենք ընդդիմության տեղերը, մեծացրել ենք: Որևէ մեկը հարց չի տալիս՝ էն ժամանակ Ազգային ժողովի հանձնաժողովի նախագահի տեղերը ինչի՞ էիք պահում: Դա մեր արածի արդյունքն է, բայց ո՞վ է դա հիշում, մեզ հայհոյեցին էդ ընթացքում, կառչած եք էդ տեղից»:
Նելլի ԳՐԻԳՈՐՅԱՆ
