«Բոլոր տիպի երկկողմ միջազգային պայմանագրերում էլ ինչ-որ իրավունքներ տալիս ես, բայց դրա դեմ ձեռք ես բերում այլ իրավունք»,-Aravot.am-ի հարցին՝ արդյոք ԵՏՄ-ին ՀՀ անդամակցության պայմանագիրը հակասահմանադրական չէ՞, մասնավորապես, որ այն հակասում է ՀՀ Սահմանադրության 1-ին՝ ինքնիշխանության մասին դրույթին, «Հայելի» ակումբում լրագրողների հետ հանդիպմանն այսպես պատասխանեց ՀՀԿ խմբակցության պատգամավոր Լեռնիկ Ալեքսանյանը: Նա որպես օրինակ բերեց, թե Եվրախորհրդին անդամակցությունը էլի ինքնիշխանության կորուստ չէ՞ր:
Պարոն Ալեքսանյանը նշեց, թե դեռ 1990-ականներից ՀՀ-ի՝ ռուսական կողմնորոշումը հայտնի էր, ՀՀ-ն իր հայացքը հառել էր դեպի Ռուսաստան:
Լեռնիկ Ալեքսանյան
Այն դիտարկումներին, թե հնարավոր է Եվրասիական տնտեսական խորհուրդը հակահայկական որոշում կայացնի ու ՀՀ-ն ստիպված լինի դա կատարել, պարոն Ալեքսանյանը նշեց. «Դեռևս հստակ չեն այդ փաստաթղթերը: Նման խնդիր չկա: Եթե Բելառուսը, Ղազախստանը, որոնք ավելի հզոր ու անկախ երկրներ են, որոնք չունեն անվտանգության այնպիսի խնդիրներ, ինչպես մենք, եթե նրանք այսօր հարմար են գտնում անդամակցելը, ՀՀ-ին ավելի անհրաժեշտ է ինտեգրումը»:
Նախկին ՊՆ փոխնախարար Վահան Շիրխանյանը ևս կողմ է ԵՏՄ անդամակցությանը. «Դրական եմ գնահատում. այս աշխարհում մեր նման երկրները պետք է ունենան դաշնակիցներ, դա լինում է միայն այն դեպքում, երբ կա ընդհանուր ազգային շահ: Միայն ՌԴ-ի հետ մենք ունենք ընդհանուր ազգային շահ: Համարում եմ, որ դա Սերժ Սարգսյանի ամենահաջող քայլերից մեկն էր»:
Կարդացեք նաև
Մեր այն դիտարկմանը, թե պայմանագիրը հակասում է ՀՀ Սահմանադրության՝ ինքնիշխանության մասին դրույթին, քանի որ ՀՀ հարկային, տնտեսական քաղաքականությունը կախված է լինելու ԵՏՄ տնտեսական խորհրդից, պարոն Շիրխանյանը պատասխանեց. «Դա մանկապարտեզ է, քանի որ ՀՀ հարկային, բանկային, վարկային բյուջետային քաղաքականությունը 1993-ից կախված է համաշխարհային բանկից և արժույթի միջազգային հիմնադրամից»:
Տաթև ՀԱՐՈՒԹՅՈՒՆՅԱՆ
