Եկող տարվա բյուջեն հնարավորությունների բյուջե է: Այսօր «Փաստարկ» ակումբում այսպիսի կարծիք հայտնեց տնտեսագետ Թաթուլ Մանասերյանը՝ զերծ մնալով եկող տարվա բյուջեին այլ գնահատականներ տալուց: Ըստ նրա, կարեւորն այն է, որ այս բյուջեում «շատ համեստ թվեր են ներկայացված, հատկապես՝ եկամուտների մասով:
Թաթուլ Մանասերյանը չի բացառում, որ համաշխարհային եւ տարածաշրջանային իրադարձություններով պայմանավորված` Հայաստանի տնտեսության մեջ որոշակի անկման միտումներ լինեն, սակայն պարոն Մանասերյանը չի կիսում այն տեսակետը, որ ԵՏՄ-ին անդամակցելը Հայաստանի համար ինքնիշխանության կորուստ է: Ըստ նրա` մեր երկրի համար անդամակցությունն այդ միությանը, թեեւ դանդաղ, բայց նոր հնարավորություններ կբացի:
Տնտեսագետը գտնում է, որ Հայաստանը պետք է սփյուռքը որպես սպառողական շուկա դիտարկի եւ տեղական արտադրությունը զարգացնելով` աշխատատեղեր ավելացնի, ինչն էլ իր հերթին սոցիալական խնդիր կլուծի եւ արտագաղթը կկանխի:
Պարոն Մանասերյանը կարծում է, որ տնտեսական աճ ապահովելու համար, առաջնահերթ ուշադրություն պետք է դարձնենք գյուղատնտեսությանը. «Մենք պատշաճ ուշադրություն չենք դարձնում հողատարածքներին, դրանց մի մասը չի մշակվում, եթե մշակվեն, ապա գյուղացիները արտագնա աշխատանքի չեն մեկնի հողը մշակեն եւ արտադրությունը կզարգանա»:
Կարդացեք նաև
Ըստ նրա, մեր երկիրը տնտեսական աճ կարող է ապահովել նաեւ գիտական արտադրությունների հաշվին: Տնտեսագետը գտնում է, որ փոքր եւ միջին բիզնեսին տրվող արտոնությունները, նախեւառաջ, պետք է քննարկվեն այդ բիզնեսի ներկայացուցիչների հետ, որպեսզի հակառակ արդյունք չունենանք, ինչպես որ եղավ Շրջանառության հարկի նվազեցման դեպքում:
Թաթուլ Մանասերյանի խոսքերով, ԵՏՄ անդամակցությունը կարող է շահավետ լինել, եթե գյուղատնտեսությունը զարգացնենք, գիտատար արտադրությունները, վերամշակող ճյուղերը, հակառակ դեպքում այդ միությանն անդամակցելով հնարավոր է վնասներ կրենք. «Եթե Հայաստանի առանձին ճյուղերի մրցունակությունը չբարձրանա, ապա ԵՏՄ երկրներից՝ Հայաստան կներկրվեն ապրանքներ եւ տեղական արտադրանքը դուրս կմղեն»:
Ըստ տնտեսագետի, ԵՏՄ-ին անդամակցելու հնարավոր վտանգների է նաեւ արտագաղթի ավելացումը, քանի որ ստեղծվում են արտագաղթի համար օրինական պայմաններ, հատկապես, որ անդամ երկրներում գործունեություն ծավալելու համար միջինից բարձր կրթություն է անհրաժեշտ. «Սա ազգային անվտանգության խնդիր է: Պետք է հավելյալ աշխատատեղեր ստեղծվեն, որ արտագնա աշխատողներին հետ բերենք: Այս մարտահրավերները ռեալ են»:
ԵՏՄ-ին անդամակցելու դեպքում մեր երկրին սպառնացող հնարավոր վտանգներից Թաթուլ Մանասերյանը նաեւ համարեց բանկային համակարգը ռիսկի ենթարկելն ու ազգային դրամը արժեզրկելը:
Լուսինե ԲՈՒԴԱՂՅԱՆ
