«Միջազգային հանրությունը ոչ համարժեք գնահատական տվեց, քանի որ տեղի ունեցածը շատ ավելի ցնցող էր ու ակնհայտ զինադադարի խախտում էր»,-այսօր «Հայելի» ակումբում լրագրողների հետ հանդիպմանը, անդրադառնալով ղարաբաղա-ադրբեջանական սահմանին գրանցված լարվածությանը և հայկական ուղղաթիռի պայթեցման հետ կապված դեպքին, այսպիսի կարծիք հայտնեց ՀՀԿ խմբակցության պատգամավոր Լեռնիկ Ալեքսանյանը:
Նա նկատեց, որ դեռևս չճշտված հարցեր կան և ամեն բան պարզ կդառնա միայն սկսված հետաքննության ավարտից հետո: ՀՀԿ-ական պատգամավորը նաև բացասական գնահատեց ոճրագործ Ռամիլ Սաֆարովի՝ նախօրեին արված հայտարարությունը:
Հարցին՝ շրջանառվող լուրերի համաձայն ռազմական վարժանքները եղել են ոչ օրինաչափ և նաև դա կարող էր պատճառ հանդիսանալ` Ադրբեջանի կողմից մեր ուղղաթիռի գնդակոծմանը, պարոն Ալեքսանյանը պատասխանեց. «Իմ ստացած ինֆորմացիայից ելնելով՝ ասեմ, որ չկա նման ինֆորմացիա, որ զինվորական սխալներ են եղել, կարծում եմ հետաքննությունից հետո ամեն բան պարզ կդառնա; Իմ տեղեկատվության համաձայն ուղղաթիռը ընթացել է չեզոք գոտով»:
Այն դիտարկումներին, թե Ադրբեջանի հերթական ոտնձգությունը կարող է ազդարարել նախապատերազմական փուլ` պատգամավորը լուրջ չի վերաբերվում. «Ես սա պայմանավորում եմ ընդհանուր մեթոդիկայով, ինքը, այսինքն` Ալիևը իր ժողովրդի հետ խնդիր ունի և փորձում է այդ խնդիրները լուծել հայրենասիրական ինչ-որ դոզայով, կամ իր շուրջը այդ պատրվակով մարդիկ հավաքելով»:
Կարդացեք նաև
Միջազգային հանրության արձագանքը նախկին ՊՆ փոխնախարար Վահան Շիրխանյանը ևս համարժեք չի համարում ու նշում. «ԵԱՀԿ-ն մի անատամ հայտարարություն արեց, նույնքան, որքան ՀԱՊԿ-ինը, ԱՄՆ պետդեպարտամենտինը, քանի որ մարդիկ խնդիր չունեն իրենց առջև դրված խաղաղություն ապահովելու, այլ ռազմավարական շահեր ունեն»:
Ըստ պարոն Շիրխանյանի՝ ՀՀ իշխանությունները պիտի կտրուկ քայլեր պետք է անեն, որ ԵԱՀԿ-ն պահանջի Ադրբեջանից մեկ ամսում ներկայացնել ոչնչացման քվոտան գերազանցող սպառազինությունը և տեխնիկան, ինչպես նաև ԵԱՀԿ-ն անհուսալի գործընկեր պիտի ճանաչի Ադրբեջանին միջազգային պարտավորությունների կատարման առումով:
Դիտարկմանը, թե հնարավո՞ր է զորավարժությունները ինչպես որ հարկն է պլանավորված չէին և պետք էր Ադրբեջանի հնչեցրած ռազմատենչ հայտարարություններից ելնելով՝ այդ գոտի չուղարկել ուղղաթիռ, ուստի մարդիկ պետք է պատասխանատու լինեն, պարոն Շիրխանյանը պատասխանեց. «Համոզված եմ, որ Սեյրան Օհանյանն անպայման կհետաքննի դեպքի պատճառները և մեղավորները պատիժներ կստանան: Բայց զորավարժություններն ամիսներ շարունակ պատրաստվում էին, և չեմ կարծում, թե նման խնդիր կա: Իսկ եթե ուղղաթիռները զինված լինեին, հրթիռ արձակողին երկրորդ ուղղաթիռն անմիջապես ոչնչացրած կլիներ»:
Շարունակելով պարոն Շիրխանյանը նշեց, թե Ադրբեջանը անհուսալի, դավադիր հարևան է ու շեշտեց. «Հիմք է հանդիսանում զինադադարի պայմանագիրը, ինչը խախտել է Ադրբեջանը, և դա չի նշանակում, որ հայերը պետք է սահմանափակվեին, իսկ ինչո՞ւ պիտի նա խախտած լիներ պայմանագիրը և այդ զոնայում ծանր հեռահար զենք ունենար»:
Վահան Շիրխանյանը մտահոգություն ունի, որ «այսօր կամ վաղը Ադրբեջանն ամբողջովին կընկնի իսլամիստ ծայրահեղականների ազդեցության տակ»:
Սերժ Սարգսյանի հայտարարությանը և ուղղաթիռով վայրէջք կատարելուն անդրադառնալով՝ պարոն Շիրխանյանն ասաց. «Սերժ Սարգսյանը համարում է, որ Արցախը մեր երկիրն է և ուղղաթիռով գնացել է այնտեղ, և ճիշտ է արել: Դա գլխավոր հրամանատարի ելույթ էր, ինչը նորմալ եմ գնահատում»:
Տաթև ՀԱՐՈՒԹՅՈՒՆՅԱՆ
