Ինչպես տեղեկացրել ենք` հոկտեմբերի 26- ին, ժամը 16.00-ի սահմաններում Երևանի 17-ամյա բնակչուհի, Կինոյի և թատրոնի պետական ինստիտուտի օպերատորական բաժնի առաջին կուրսի ուսանողուհի Դիանա Շահբազյանը համակուրսեցիների հետ Գյումրու թատրոնի պատմամշակութային արժեք ներկայացնող հին շենքում (այն ծայրաստիճան վթարային է) նկարահանումներ կատարելիս, մոտ 8 մետր բարձրությունից վայր էր ընկել: Նա փորձել է լուսանկարել շենքը, բարձրացել էր վերև, սակայն կտուրից հայտնվել էր կառույցի ներսում` ստանալով մարմնական ծանր վնասվածքներ: Նրան նախ բուժօգնություն էին ցուցաբերել Գյումրու բժշկական կենտրոնում, այնուհետ ռեամոբիլով տեղափոխել էին «Էրեբունի» բժշկական կենտրոն:
Աղջկա ծնողները դժգոհում էին, որ կառույցի վթարավտանգ լինելու մասին որևէ տեղ նախազգուշացում փակցված չի եղել: Գյումրու իշխանություններն էլ, բավական վատ զգալով կատարվածից, նշում էին, որ ողջ Գյումրին է վթարավտանգ, եթե այդպես լիներ, քաղաքի շենքերի մեծ մասին վրա նման ցուցապաստառներ ու «կարմիր լենտեր» էին փակցնելու: Թե ով է պատասխան տալու Դիանիայի հետ կատարված համար, այս հարցը լուծում են իրավապահները:
Շիրակի մարզի դատախազ Րաֆֆի Ասլանյանը Aravot.am–ին փոխանցեց, որ իր հանձնարարականով քրեական գործ է հարուցվել փաստի առթիվ՝ ՀՀ Քրեական օրենսգրքի 120 հոդվածի հատկանիշներով: Այն կոչվում է «Անզգուշությամբ առողջությանը ծանր վնաս պատճառելը» և նախատեսում է՝
1. Անզգուշությամբ մեկ ուրիշի առողջությանը ծանր վնաս պատճառելը՝ պատժվում է տուգանքով՝ նվազագույն աշխատավարձի առավելագույնը երկուհարյուրապատիկի չափով, կամ ուղղիչ աշխատանքներով՝ առավելագույնը մեկ տարի ժամկետով, կամ կալանքով՝ մեկից երկու ամիս ժամկետով: Մենք Դիանայի մայրիկից՝ Սյուզաննա Ավետիսյանից տեղեկացանք, որ աղջկան թեև դուրս են գրել հիվանդանոցից, տանն է պառկած, սակայն նա բժիշկների հսկողության տակ է, նրան դեռ երկար բուժում է անհրաժեշտ, սպասում են վիճակը փոքր-ինչ բարելավվի՝ վիրահատություններ կատարելու համար:
Կարդացեք նաև
Մանրամասները՝ տեսանյութում.
Նունե ԱՐԵՎՇԱՏՅԱՆ
