Վարչական դատարանում այսօր՝ նոյեմբերի 14-ին, դատավոր Արման Դիլանյանի նախագահությամբ, շարունակում էր քննվել Հելսինկյան քաղաքացիական ասամբլեայի (ՀՔԱ) Վանաձորի գրասենյակի հայցն ընդդեմ ոստիկանության շտաբի:
Ոստիկանության շտաբի ներկայացուցիչ Տիգրան Ավետիսյանը իր բացման խոսքում նշեց, որ ոստիկանության պետի հրամանը բխում է օրենքից եւ կառավարության որոշումներից, իսկ «ՀՀ ոստիկանության գաղտնագրման ենթակա տեղեկությունների ընդլայնված գերատեսչական ցանկերը հաստատելու մասին» թիվ 2-ՆԳ հրամանը պետական գաղտնիք է պարունակում:
ՀՔԱ Վանաձորի գրասենյակի ներկայացուցիչ Արայիկ Զալյանը հայտարարել էր, որ ոստիկանության պետի հրամանը չի գրանցվել արդարադատության նախարարությունում, սակայն Տիգրան Ավետիսյանը հայտարարեց, որ 2005 թվականի փետրվարի 21-ին այն գրանցվել է:
Արայիկ Զալյանի հարցին՝ կարո՞ղ է նա ապացուցել այդ հանգամանքը, Տիգրան Ավետիսյանը պատասխանեց, որ կարող է, բայց հաջորդ դատական նիստի ընթացքում:
Կարդացեք նաև
Արայիկ Զալյանի մեկ այլ հարցին, թե ինչո՞վ է տարբերվում 1998 թվականին կառավարության ընդունած 173 որոշումը «ՀՀ ոստիկանության գաղտնագրման ենթակա տեղեկությունների ընդլայնված գերատեսչական ցանկերը հաստատելու մասին» թիվ 2-ՆԳ հրամանից, Տիգրան Ավետիսյանը պատասխանեց, որ 173 որոշումը ներկայացնում է պետական գաղտնիքների շարքը դասվող տեղեկությունների ցանկը:
Դատավոր Արման Դիլանյանը հետաքրքրվեց, թե ինչպե՞ս կարող է Տիգրան Ավետիսյանը ապացույց ներկայացնել արդարադատության նախարարությունում հրամանի գրանցման մասին, նա պատասխանեց, որ կարող է բերել «ՀՀ ոստիկանության գաղտնագրման ենթակա տեղեկությունների ընդլայնված գերատեսչական ցանկերը հաստատելու մասին» թիվ 2-ՆԳ հրամանը՝ արդարադատության նախարարության կնիքով: Այդ դեպքում նա պահանջեց անցկացնել դռնփակ դատական նիստ, սակայն դատավորն ասաց, որ իրենք չեն պատրաստվում հրապարակել հրամանը:
Դատավոր Դիլանյանը հավելեց, որ դատարանը հարցում կուղարկի արդարադատության նախարարություն, որպեսզի տեղեկանա, թե թիվ 2-ՆԳ հրամանը արդյոք գրանցվա՞ծ է, թե՞ ոչ:
Դատական նիստը հետաձգվեց, քանի որ դատարանը կարեւորում է այդ փաստական հանգամանքը ճշտելու հարցը:
Ամի ՉԻՉԱԿՅԱՆ
