Այսօր ՍԴ-ի դիմաց ոստիկանների ու ակտիվիստների բախման ահազանգով դեպքի վայր եկան ՄԻՊ գրասենյակի աշխատակիցները: Նրանք կատարվածի մանրամասներին ծանոթանալու համար զրուցեցին ակտիվիստների ու ոստիկանների հետ:
«Եթե քաղաքացիները գտնում են, որ ոստիկանները հանցագործություն են կատարել, կարող են այդ հետքերով հանցագործության մասին հաղորդում ներկայացնել պատկան մարմիններին»,- եզրահանգեց ՄԻՊ աշխատակիցներից մեկը:
Ակցիայի մասնակիցներից մեկը հետաքրքրվեց, եթե ոստիկանն իրեն թույլ չի տալիս մայթին կանգնել՝ առանց իրավական հիմքեր ներկայացնելու, դա սահմանադրական իրավունքի խախտում չէ՞:
«Հիմա չասեմ՝ դա խախտում է՝ ոչ: Քաղաքացիներն ունեն ազատ տեղաշարժվելու իրավունք, այնտեղ, որտեղ արգելված չէ: Թե ինչու են ոստիկաններն այս պահին արգելում, պարզաբանումներ պետք է ստանանք ոստիկանությունից»,- պատասխանեց ՄԻՊ ներկայացուցիչը:
Կարդացեք նաև
Ցուցարարներից մի քանիսն էլ բարձրաձայն իրենց դժգոհությունն արտահայտեցին ՄԻՊ-ի գրասենյակի աշխատանքից՝ պնդելով, որ երբեւէ կոնկրետ դիտարկումներ չեն ներկայացնում:
Հիշեցնենք, որ այսօր մի խումբ քաղաքացիներ բողոքի ակցիա էին անցկացնում դատարանի դիմաց, մինչ դատարանում քննվում էր ԵՏՄ անդամակցության մասին պայմանագրի սահմանադրական լինելու հարցը:
Արփինե ՍԻՄՈՆՅԱՆ
