Սահմանադրական դատարանի դիմաց ոստիկանների կողմից քիչ առաջ բռնությունների ենթարկված մի քաղաքացու համար շտապ օգնություն են կանչել:
Նրա ինքնազգացողությունը վատացել է, սրտի գանգատներ ունի: Նշված քաղաքացին բանակում մահացած Արման Մուրադյանի հայրն է՝ Հովսեփ Մուրադյանը:
Նրա պատմելով, ոստիկանները իրեն հրելով երկար տարածություն քարշ են տվել:
Հովսեփ Մուրադյանի կինը բղավում է, որ երկու օր առաջ էլ նախագահական նստավայրի դիմաց են քարշ տվել. «Երեւի հրաման են ստացել սրա գլուխն էլ ուտեն, ինչպես որդունս»:
Կարդացեք նաև
Տղամարդը բողոքում է, որ իր որդու սպանության գործով դատական նիստերը տեղի են ունենում Ղարաբաղում.« Զինվորները ցուցմունք են տվել, որ տղայիս սպանել են, բայց ասել են, որ եթե Ղարաբաղում դատական նիստերին ճիշտն ասեն, Հայաստան հետ չեն գա: Պատմում են, որ իրենց սպառնացել են»:
Հայաստանի Սահմանադրությունը ցույց տալով, տղամարդը հարցնում է՝ ո՞ր հոդվածով է նշվում, թե գործը պետք է Ղարաբաղում քննվի:
«Մեր պահանջն է, որ ՍԴ նախագահը մի անգամ ընթերցի սահմանադրությունը, ոչ թե աթոռ զբաղեցնելն է, այլ Սահմանադրությունը կիրառելը: Տասը նիստ են անցկացրել առանց մեզ՝ տուժող կողմի»:
Արփինե ՍԻՄՈՆՅԱՆ
