Նախախորհրդարանի անդամ, ազատամարտիկ Գագիկ Սարուխանյանը ի պատասխան ԵԿՄ նախագահ Մանվել Գրիգորյանի ասածներին, թե քաղաքականությամբ զբաղվող ազատամարտիկն այլեւս ազատամարտիկ չէ, պնդում է, որ ամենաշատը հենց Մանվել Գրիգորյանն է քաղաքականության մեջ խորացած:
«Այդ գեներալը իրեն քաղաքական գործիչ չի համարում, բայց ամենաշատն ինքն է քաղաքական տարբեր հոսանքների կողմից օգտագործվում: Սերժ Սարգսյանը երկիրը հասցրեց այս վիճակին,ինքն էլ ասում է՝ ես ծառայում եմ իմ նախագահներին: Նախագահներիդ ծառայիր, բայց երկիրն է կործանվում: Նրան երկրի ապագան հետաքրքիր չէ, ինքն իր անձնական խնդիրներն է լուծում՝ ընդամենը ծառայելով կոնկրետ նախագահի, բայց այդ նախագահը ժողովրդի թշնամին է: Մեր երկրի երեք նախագահներն էլ ժողովրդի թշնամին են եղել, որովհետեւ Հայաստանի զարգացումը չեն տարել այն ուղղությամբ, որ պետք էր: Իսկ Մանվել Գրիգորյանը ծառայում է նախագահին, ոչ թե երկրին»,- ասաց Գագիկ Սարուխանյանը:
Նրա խոսքով, եթե Մանվել Գրիգորյանի ասածների տրամաբանությանը հետեւենք, ապա ազատամարտիկներ չեն նաեւ Ազգային ժողովում հայտնված որոշ պատգամավորներ, որոնք ազատամարտի մասնակից են.«Եթե ազատամարտիկը երկրի ապագայով չի մտահոգվում, չի զբաղվում քաղաքականությամբ, ուրեմն նախկին ազատամարտիկներ են: Իսկական ազատամարտիկը նա է, որն ամեն օր պայքարում է վաղվա ազատության համար: Հիմա Մանվել Գրիգորյանն ազա՞տ է»:
Հիշեցնենք, որ Մանվել Գրիգորյանը նախօրեին ասել էր, որ քաղաքականությամբ զբաղվող ազատամարտիկներին ազատամարտիկ չի համարում:
Կարդացեք նաև
Արփինե ՍԻՄՈՆՅԱՆ
