Անահիտ Բախշյանի կողմից տարածած «Վեց երեխաների կրթությունից զրկված լինելու համար Երևանի քաղաքապետն է պատասխանատու» վերտառությամբ հայտարարության վերաբերյալ
Երևանի ավագանու «Բարև Երևան» խմբակցության անդամ Անահիտ Բախշյանի տարածած «Վեց երեխաների կրթությունից զրկված լինելու համար Երևանի քաղաքապետն է պատասխանատու» վերտառությամբ անհիմն հայտարարության վերաբերյալ հարկ ենք համարում տեղեկացնել, որ մայրաքաղաքի Շենգավիթ վարչական շրջանի Նոր Խարբերդի 2-րդ փողոցի 11/1 տանը բնակվող ազատամարտիկ Գագիկ Հովհաննիսյանի բազմազավակ ընտանիքը մշտապես եղել և մնում է Երևանի քաղաքապետարանի համապատասխան ստորաբաժանումների ուշադրության և հոգածության ներքո:
Ընտանիքը հաշվառված է ընտանիքների անապահովության գնահատման համակարգում՝ 8 անձով և, որպես բազմազավակ ընտանիք, ընդգրկված է պետական աջակցության ծրագրերում:
Մասնավորապես. 20.05.2013թ. ծնված երեխայի՝ Անահիտ Հովհաննիսյանի ծննդյան կապակցությամբ ստացել է 430000 դրամ միանվագ ծննդյան նպաստ, 50.000 դր. միանվագ օգնություն, մյուս երեխայի առաջին դասարան հաճախելու կապակցությամբ 25.000 դր.՝ հագուստի և այլ պարագաների գնման նպատակով: Բացի այդ, ամսական 68500 դրամի չափով ընտանեկան նպաստ է ստանում: Արմենուհի Մանուկյանի տղան՝ Ջիվան Հովհաննիսյանը ծառայում է բանակում, դուստրը և 2 ավագ որդիները ամուսնացած են: Վերջինները բնակվում են 2011 թվականին Երևանի քաղաքապետարանի կողմից ընտանիքին նվիրաբերված Քանաքեռ 14 փողոցի 38 շենքի երկու բնակարաններից մեկում՝ հ. 39 երկսենյականոց բնակարանում:
Կարդացեք նաև
Ինչ վերաբերում է ազատամարտիկի ընտանիքի նկատմամբ քաղաքային իշխանությունների վերաբերմունքին, ապա նշենք, որ Երևանի քաղաքապետի հանձնարարությամբ նշված ընտանիքը մշտապես եղել է քաղաքապետարանի, Շենգավիթ վարչական շրջանի ղեկավարի աշխատակազմի և անձամբ վարչական շրջանի ղեկավարի հոգածության ներքո.
2011 թվականի դեկտեմբերից մինչև 2014 թվականը վարչական շրջանի կողմից պարբերաբար ստացել է դրամական աջակցություններ՝ ընդհանուրը 200.000 դրամի չափով:
Այս տարվա սեպտեմբերի 8-ին Հովհաննիսյանների ընտանիքի դպրոցահասակ երեխաներին վարչական շրջանի աշխատակազմի կողմից տրամադրվել են գրենական պիտույքներ, հագուստ, կոշկեղեն, նաև միջնորդագիր է ուղարկվել թիվ 173 դպրոց՝ երեխաներին ուսումնական գրականությամբ անվճար աջակցելու համար:
Սեպտեմբերի 23-ին ազատամարտիկի երեխաներին օժանդակելու խնդիրը սոցիալական ապահովության վարչության կողմից քննարկվել է վարչական շրջանի ղեկավարի աշխատակազմի համապատասխան բաժնի հետ և Երևանի քաղաքապետի հանձնարարությամբ առաջարկվել է օժանդակել ընտանիքին: Այնուհետև կատարվել է տնային այցելություն, երեխաների դպրոցական կարիքները հոգալու նպատակով տրամադրվել են ձմեռային կիսաճտքավոր կոշիկներ, գուլպաներ, տաբատներ, գրենական պիտույքներ, պայուսակներ` ըստ ընտանիքի ներկայացրած կարիքի, սակայն երեխաները դարձյալ կանոնավոր չեն հաճախել դպրոց, չնայած օգտվում են նաև դպրոց տանող անվճար ավտոբուսից:
28.10.2014-ին վարչական շրջանի ղեկավարի և երեխաների հոր՝ Գ.Հովհաննիսյանի հետ քննարկվել է ընտանիքին աջակցելու նպատակով Խարբերդ թաղամասում բանջարեղենի կրպակի տեղադրման հնարավորությունը, Գ. Հովհաննիսյանը առաջարկել է իրենց տրամադրել մեկ կով, որով կհոգան ընտանիքի որոշակի պարենային խնդիրները, որի հնարավորությունը նույնպես ներկայում քննարկվում է:
Չնայած ձեռնարկված միջոցներին, երեխաները կրկին բացակայել են դպրոցից՝ տարբեր պատճառաբանություններով: Ավելորդ չէ նաև նշել, որ հաճախակի բացակայությունների պատճառով ծնողները ամիսներ առաջ հրավիրվել են դպրոց, իսկ Շենգավիթ վարչական շրջանի ղեկավարի նախաձեռնությամբ պարբերաբար կազմակերպվել են բազմակողմանի օգնություններ և ծնողները վստահեցրել են, որ երեխաները կհաճախեն դպրոց, ինչում, սակայն, հետևողական չեն գտնվել:
Կանաց միամսյակի կապակցությամբ Երևանի քաղաքապետ Տարոն Մարգարյանի հանձնարարությամբ իրականացվող ծրագրի շրջանակներում, 03.04.2014թ. ՀՀԿ կանանց խորհրդի նախագահ, ազգային ժողովի փոխխոսնակ Հ. Նաղդալյանը, Երևան քաղաքի ավագանու ՀՀԿ խմբակցության անդամ Նաիրա Նահապետյանը և Երևանի քաղաքապետարանի սոցիալական ապահովության վարչության պետ Ռուզաննա Զաքարյանը այցելել են քաղաքացու ընտանիք՝ շնորհավորելու բազմազավակ մայր Արմենուհի Մանուկյանին, և ընտանիքին տրամադրվել է դրամական օժանդակություն, հագուստ, նաև քաղաքապետի կողմից նվերներ նրանց նորածնին: Տեղեկատվությունը լուսաբանված է տարբեր լրատվամիջոցներով, նաև Երևանի քաղաքապետարանի պաշտոնական կայքէջում։ Ի դեպ, այս տարի ընտանիքի մայրը ինքն է հրաժարվել երեխաներին ամառային ճամբար ուղարկելու քաղաքապետարանի կողմից արված առաջարկից:
Հարկ է նաև նշել, որ «Էրեբունի-Երևան 2796» տոնակատարության սոցիալական բաղադրիչի շրջանակներում քաղաքապետի հանձնարարությամբ ընտանիքին նվիրաբերվել է կենցաղային տեխնիկա:
Ավելորդ չենք համարում նաև նշել, որ Նոր Խարբերդի 2-րդ փողոցի 11/1 տունը, որտեղ ներկայում բնակվում է ընտանիքը, գնվել է 2007 թվականին՝ ՀՀ պաշտպանության նախարարության կողմից այդ նպատակով ընտանիքին տրամադրված շուրջ 25.0 մլն դրամով:
Ներկայացվածը թերևս բավարար է փաստելու, որ Հովհաննիսյանների ընտանիքը մշտապես օգտվել և օգտվում է ինչպես պետության, այնպես էլ Երևանի քաղաքապետարանի կողմից իրականացվող սոցիալական աջակցության բոլոր ծրագրերից:
Մնում է միայն հավելել, որ ընտանիքը եղել և շարունակելու է մնալ քաղաքապետարանի հոգածության ներքո՝ այսուհետ ևս ընդգրկվելով սոցիալական ծրագրերում:
Ավելորդ չի լինի նշել, որ ցանկության դեպքում այս ամենին կարող էր տեղեկանալ նաև Երևանի ավագանու հարգարժան անդամ Անահիտ Բախշյանը, ինչը, սակայն չի արել՝ գերադասելով հիմնազուրկ ապատեղեկատվության տարածումը:
Երևանի քաղաքապետարանի աշխատակազմի սոցիալական վարչություն
